New Delhi, Nailur:
Ka General Secretary jong ka AICC ka Priyanka Gandhi Vadra kan sa ai jingkren ha ka jingïalang paidbah ka ban long ha ka jaka ban pynlong ïa ka ilekshon ha Dhar distrik kaba don ha Madhya Pradesh ha ka 5 tarik, Risaw kum shi bynta ban rakhe ïa ka jingpynkut ïa ki “Jan Akrosh” Yatra jong ka seng.
U State Congress Media Department In-charge u KK Mishra ha ka jingïakren bad ki nongthoh khubor u la ong ba ïa ki Yatra la sdang ban pynlong na 7 tylli ki jaka ha kaba ka la ïaid lyngba da kumba 40 per cent ka jingïaid lynti ha ki 6 sngi.
“Ïa ka jingïalang paidbah yn pynlong ha Mohankheda kaba don ha Dhar distrik ha ka 5 tarik, Risaw kum shi bynta ban rakhe ïa ka jingpynkut ïa kine ki Yatra,” la ong u Mishra.
Hashwa ban pynlong ïa ka Assembly ilekshon, ka ban sa long kham hadien jong une u snem, ka seng kaba bat ïa ka jingsynshar ka BJP ka la weng noh ban pynlong ïa ka ‘Jan Ashirwad Yatra’ ha ka 3 tarik, Nailur bad ka seng Congress ka la pynlong ïa ka ‘Jan Akrosh Yatra’ ha ka 19 tarik, Nailur.
Ka seng Congress ka la wanrah ïa kiba bun ki mat ïakren kiba kynthup halor ka kam bamsap, ka jingbym ïohkam ïohjam, ka jingshah banbeiñ jong ki Dalit bad ka jingjur jong ka jingkiew dor ki mar ki mata.
