New Delhi, Nailur:
Ka General Secretary jong ka seng Congress ka Priyanka Gandhi Vadra ha ka sngi Ba-ar ka la kynthoh jur ïa ka sorkar kmie halor ka jingshah pynïap jong arngut ki khynnah pule ha ka jylla kaba la shah ktah jur na ki jingïakynad ha Manipur, ha kaba ka la ong ba ka la dei ban sngewlehraiñ namar ka jingbym lah jong ka ban leh ei ei halor kane, naba ki jingïakynad bad ki jingïapher jingmut ki dang ïai bteng ha Manipur, ha kaba ka la bynrap shuh shuh da kaba ong ba ka la dei ban sngewlehraiñ na kane ka jingbym lah ban leh ei ei halor kiba bun ki kam pyntriem ba la jia kiba dang ïai bteng haduh mynta.
Ha ka jingphah khubor lyngba ka Twitter, ka Priyanka Gandhi ka la ong, “Ki la mih ki khubor kiba bun halor ki jingjia kiba la buh jingkyndit, pynlyngngoh bad pyntieng pynsyier ruh ïa baroh ha Manipur. Ki khynnah ki la paw ba ki la long ki lanot kiba la shah ktah jur ha kine ki jingjia ïakynad. Ka dei ka kamram jong ngi ba ngin leh ïa kiei kiei baroh kaba ngi lah khnang ban ai jingïada na ka bynta jong ki.”
