Noida, Nailur:
Kawei ka longkmie napoh ka nongbah Noida ka la shah siat iap ha 2 ngut ki runar kiba leit poi da ki thuk shuk sha Noida ha ka Sngi Ba-ar. Katei ka briew ka dei kaba la don ha ki rta kumba 40 snem eiei bad ka trei kum ka nongiarap ha kawei ka kompeni. Ha shwa ban wan lap katei ka jingjia katei ka briew ka dang thmu ban leit sha Dadri jong ka Surajpur ha ka por 8:30 mynstep.
Ia katei ka briew la ithuh kum ka Rajkumari bad ha katei ka sngi ka dang iaid dang kumba katto-katne ka jingjngai na ka iing sah jongka, ha kaba 2 ngut ki runar kiba leit poi da ka thuk-thuk tang mar ia poi ha katei ka jaka, ki la sei ia ka suloi bad synreit kuli ia ka bad hadien kata ki la phet bak ha shwa ban wan poi ki pulit.
Ka khun jong ka Rajkumari ka la iathuh ha ki pulit ba ka la don ka jingiania bad jingiathud hapdeng jong ka kmie jongka bad ka hynmen jongka ha kine ki khyndiat por ba la leit namar ki daw ka pisa- pilaiñ. Hynrei ym lah pat ban tip la kane kan long ka jingpynhiar kput jong katei kaba shipara badka ne da kiwei pat ki briew ki bym don jingithuh.
La ong ba katei kaba shi para bad ka Rajkumari ka sah ha kawei na ki shnong jong ka distrik Palwal jong ka jylla Haryana ha ryngkat bad 2 ngut ki khun jongka bad katei ka hynmen ka la byrngem ruh ia ka Rajkumari naduh katei ka por ba don ka jingïakynad hapdeng jongki halor katei ka pisa.
U heh pulit ka Greater Noida, u Saad Mian Khan ha ka ejahar ba la ujor hapoh ka tnat pulit jong ka Dadri, u la iathuh ba ki kynhun pulit ki dang wad bniah bad tohkit bniah ia baroh kiba don jingiadei bad kiba iadei kam bad katei ka briew khnang ban lap ia ka jingshisha bad ka daw jong katei ka jingshah siat iap jongka bad kumjuh ruh ban ioh kem noh ia kitei ki runar kiba don kti ha katei ka jingjia.
