Bhubaneswar, Nailur:
U Myntri Rangbah jong ka Odisha u Naveen Patnaik u la ong ba ka seng kaba bat ïa ka jingsynshar ha ka jylla ka BJD kan sa pynlong ïa ka ‘Jan Sampark Padayatra’ naduh ka 2 tarik, Risaw haduh ka 11 tarik, Risaw halor ka jingthmu ban pynbna paidbah ïa ki prokram ai jingmyntoi ba la leh da ka sorkar jylla.
U Patnaik, ha ka shithi ba u la pyllait sha baroh ki kynhun treikam jong ka seng, u la ong ba ka ‘padayatra’ kan sa long sha baroh ki jaka pdeng bad kyndong-kynshrot jong ka jylla.
U Vice-president jong ka seng BJD u Debi Prasad Mishra ha ka jingïakren bad ki nongthoh khubor u la ong ba ki nongbud jong ka seng bad ki nongïalam kin sa leit sha ki jaka ai jinghikai kiba don ha baroh ki konstitwensi.
Ki President jong ki distrik, ki nongjurip bniah bad kiwei pat ki nongïalam jong ka seng kin sa pyntreikam ïa kine ki jaka ai jinghikai.
Kane ka ‘padayatra’ kan sdang naduh ki kynhun seng ha ki distrik bad ka ban pynlong ha man ki Ward bad ki Panchayat ha baroh kawei ka jylla. Baroh ki kynhun jong ki seng kin sa treikam bad ïashim bynta, u la ong.
U Mishra u la ong ba ka seng BJD kan sa pynlong ruh ïa kiwei pat ki prokram kiba kynthup ïa ka jingnoh synñiang da ka snam bad ki prokram thung dieng ha ka jylla.
