Imphal, Nailur:
Ka sorkar Manipur ha ka Sngi Ba-ar ka la pynbna ïa ka rai ban pynsangeh treikam biang ïa ka Internet na ka bynta san sngi namar ki jinglong jingman ha ka jylla hadien ka jingïap jong arngut ki khynnah pule. Katkum ka jingphah hukum jong u Joint Secretary jong ka tnat kam pohïing, ka sorkar ka la rai ban pynsangeh treikam ïa ki Mobile Data Services lyngba ka VPN ha ka jylla naduh ka por ba la pynbna ban khang haduh ka por 7:45 janmiet jong ka 1 tarik, Risaw khnang ban khanglad ïa kino kino ki jingjia kiba lah ban ktah ïa ka jinglong jingman. Lada lap ïa kino kino ki briew kiba donkti ban pynïap ïa kine ki khynnah yn sa pynshitom ïa ki katkum ki kyndon aiñ.
Ka sorkar Manipur ha ka lah sngi U Blei ka la phah da ka jingthoh ban pynshisha ïa ka khubor ba sngewsih ba ki arngut ki khynnah pule Meitei ha kaba ïa ki dur jong ki la ïohi na ka jingpynsaphriang ha ki lad phah khubor ba ki la shah pynïap, bad halor kane ka jingjia la aiti sha ka kynhun Central Bureau of Investigation (CBI) na ka bynta ban pynlong ïa ka jingtohkit. Hadien ba la pynkut noh ka jingpynsangeh treikam ïa ka Internet ha Manipur, la lah ban ïohi ïa ki dur jong kine ki samla pule ha kaba la tip ba kine ki dei kiba la jah naduh u bnai Naitung.
Ka jingthoh kaba la wan na ka sorkar jylla ka la pynbna ba katkum ki dur ba la paw, la ong ba ka dei ka jong ka Hijam Linthoingambi (17) bad u Phijam Hemjit (20), kine baroh arngut ki dei ki nongshong shnong jong ka Imphal, ha kaba ki dur jong ki ki la saphriang ha kiba bun ki lad phah khubor. Kumba la ïathuh da ki pulit jong ka nongbah Imphal, la suba ba kine ki arngut ki samla ki lah ban shah pynïap ha ki lehnoh Kuki. Ïa ka jingïakhih ban pyrshah halor kane ka jingjia la pynlong hapoh ka lama jong ka All Manipur Students’ Union (AMSU).
