Chandigarh, Nailur:
U MLA jong ka seng Congress u Sukhpal Singh Khaira hynnin ka sngi u la shahkem ha ki pulit jong ka Punjab halor ka jingshah pynshisha ba u la donkti ha ka kam khaïi drok bad ka jingkamai ïa ka spah bymhok.
Ha ka jingpyntreikam kaba la long ha ka por dang step, ka kynhun jong ki pulit ka Punjab ki la poi ha ka jaka sah jong u Khaira bad pynlong ïa ka jingkhynra ha kaba ïadei bad ka mukotduma kaba la rim ïa kaba la buh jingmudui ha u snem 2015 hapoh ka jingtreikam jong ka Narcotic Drugs and Psychotropic Substances (NDPS) Act ha Jalalabad, kaba don ha Fazilka.
Ki jingkynnoh barim pyrshah ïa u Khaira ki kynthup ha kaba ïadei bad ka jingai jingkyrshan ïa ki nongkhaïi tuh kiba nabar ri, ka jingai jaka rieh na ka bynta jong ki bad ka jingïoh pdiang ïa ki jingmyntoi kaba long da ka pisa na ki nongkhaïi drok.
