Shillong, Nailur 29
Ka nongai-ktien jong ka All India Congress Committee (AICC), ka Onika Mehrotra ka la kynthoh tyngeh ïa ka Bharatiya Janata Party (BJP) halor ka ‘Women’s Reservation Bill’ bad ong ba kane ka dei tang ka buit ilekshon ban khring ïa ki nongthep ‘vote’ kiba dei ki kynthei.
Haba kren sha ki lad pathai khubor ha ka Sngi Thohdieng, ka la pynkynmaw ba katei ka ‘Bill’ ka dei kaba la wanrah da ka Congress naduh ka por jong u Rajiv Gandhi ha u snem 1989.
“Ka dei ka jingangnud jong u ban ai bhah ïa ki kynthei khamtam ha ka liang ki kam saiñ pyrthei bad ha ka bynta ba kongsan ha ka imlang-sahlang,” ka la ong.
Ha kajuh ka por, ka la pynsngew halor ka jingpyntreikam ïa ka bhah kaba 33% na bynta ki kynthei ha ki Panchayati Raj ha ka por jong u Narasimha Rao kum u Myntri Rangbahduh ka ri.
Kumjuh ha u snem 2010, ha ka por u Dr. Manmohan Singh kum u Myntri Rangbahduh ka ri, ka Mehrotra ka la ong ba la wanrah ïa ka ‘Women’s Reservation Bill’ bad la mynjur ha Rajya Sabha haba ïadei bad ka bhah ba 33% na bynta ki kynthei ha Lok Sabha bad ha ki ïingdorbar jong ki Jylla hynrei ym shym la lah ban mynjur pat ïa ka ha Lok Sabha.
Haba kdew ba ka Sonia Gandhi ka la thoh sha u Myntri Rangbahduh ka ri ha u snem 2016, 2017 ban pynbor ïa kane ka Sorkar ban mynjur noh ïa kane ka ‘Bill’, ka la ong ba wat hadien kitei ki jingthoh, ym shym la jia eiei tat haduh ka kylla khatduh jong kine ki 9 snem shiteng.
“Hooid, ngi sngewkmen ba ki kynthei kin ïoh bhah hynrei ki don 2 tylli ki bynta kiba buh jingma bad ki bym lah ban pynurlong ha ka ilekshon ban wan ha u 2024. Ka don ïa ka bynta ba ïadei bad ka jingphiah konstitwensi, ka don ïa ka bynta ba ïadei bad ka khana samari bad tat ynda la pynkhuid shuwa ïa kine, ki kynthei kin ym pat ïoh bor ban ïakhun ilekshon. Kumta ka jingthmu jong kane baroh ka la shah rem noh,” ka la ong.
Ka la buh jingkylli ruh ba balei ka shim por ïa ka BJP haduh katta, bad balei kam shym la treh ban mynjur ïa katei ka ‘Bill’ hangto-hangto.
Haba pynsngew ba bun bah ki kynthei ki la ‘vote’ na bynta ka BJP, ka la ong, “Haba phi la ïohi ba ki kynthei ki ‘vote’ na bynta jong phi, balei phi pynslem, balei phim leh noh hangto-hangto. Phi don ka bor bad ka jingbun paid, te balei phi la pynslem.”
Na ka liang jong ka, ka la kren shai ba ka Congress ka ïeng na bynta ka ‘Bill’ hynrei kitei ar bynta haneng ki long mawjynthut pynban ban pyntikna ba ki kynthei ki ïoh ïa kane ka bhah.
Ka la ong ruh ba ka BJP ka la sngewthuh ba ka ilekshon ka la jan bad kumta ka la sdang ïa ka jingkular thok – kaba ka tbit bha ha kane ka liang.
“Ki sngewthuh shai ba lada kim lah ban wanrah ïa kano-kano ka mat treikam kaba skhem na bynta ki kynthei, kin sa duh ïa ki nongthep ‘vote’ ba dei ki kynthei, la ka dei ka kyrduh kam, ka jingkiew ha ka dor ka mur, ki kam thombor pyrshah ïa ki kynthei bad kumta ter-ter,” ong katei ka nongai-ktien.
Ka la kynnoh ba baroh ki la thait la ngiah ïa kane ka Sorkar ba mynta bad namar ka jingsngewthuh ba kan sa pulom ki mih shakhmat bad kane ka ‘Bill’.
Shuh shuh, ka Mehrotra ka la bynrap, “Kam dei ban long ka kam ka ban ïalam bakla, hynrei ka dei ban don ka jingskhem jingmut bad la dei ban pyntreikam noh mar-mar ïa ka.”
