Mumbai, Nailur:
Ki nongkhaïi drok ki la shahkem ha Mumbai halor ka jingshah pynshisha jong ki ba ki la rah ïa u MDMA (Methylenedioxy methamphetamine) uba la kot sha ka T. 15.42 lak, la ïathuh ki pulit ha ka sngi Palei.
“Ka kynhun Anti Narcotics Cell (ANC) jong ki pulit ka Mumbai ki la kem ïa uwei u nongkhaïi drok jong kawei ka kynhun uba la rah da ki kuli MDMA ( methylenedioxy methamphetamine) uba la kot sha ka T. 15.42 lak. Une uba la shah kynnoh u dei uba pule ha ka kyrdan Commerce Graduate ha kaba la shem ba ym pat don dak sniew ei ei ki ban long pyrshah ïa u hashwa,” la ïathuh ka kynhun Anti Narcotics Cell Branch.
Ki pulit ki la ïathuh ba la ïoh ban kurup ïa u drok bad la buh jingmudui ruh pyrshah ïa une uba la shahkem ha kaba ïadei bad ka jingjia. Hashwa kane, ha kaba ïadei bad ka jingpyntreikam jong ki pulit ka Mumbai ha ka sngi Palei, ïa u drok uba la kot sha ka T. 31 lak la ïoh ban kurup na ka thaiñ Mankhurd kaba don ha Mumbai hapoh ka jaka treikam jong ki pulit ka Trambe, da kaba kem ïa arngut kiba la shah kynnoh donkti, la ïathuh ki pulit.
Katkum ka jingpynshisha jong ki pulit, la ong ba une u drok u don kumba 6 kilo bad uba la kot sha ka T. 31 lak lada die ïa u sha kylleng ki ri. Ïa kine kiba la shahkem la tip kyrteng kum u Nadeem Mohammad Idris Shah bad u Akshay Lakshman Vaghmare.
Ka la don ka jingbuh jingmudui pyrshah ïa kine ki arngut hapoh ka kyndon Narcotic Drugs and Psychotropic Substances Act (NDPS) ha ka jaka treikam jong ki pulit kaba don ha Trambe, ha Mumbai.
