New Delhi, Nailur:
Ka National Investigation Agency (NIA) ha ka Sngi Balang, ka la ioh bat ia katto katne ngut ki suba don kti ban iatrei lang bad ki lehnoh Khalistan lem bad kiwei lehnoh na kiwei pat ki ri kum ka Pakistan bad ka Canada, bad kiba pyndonkam ia ki network jong kitei ki kynhun lehnoh na ka bynta ban wanrah ia ki kam thombor.
Katei ka jingleit khynra jong ka NIA ka long ban wad ia kito kiba don kti bad ki lehnoh na Canada bad kiba thmu ban wan thombor sha India. Ha ka taiew ba la dep, u Myntri Rangbahduh ka Canada- u Justin Trudeau u la kynnoh ba dei ki briew jong ka sorkar India kiba ïadon kti lang ha ka jingpyniap ia u lehnoh nong Canada ha u Jylliew jong une snem.
Hynrei, ka India ka la bitar halor katei ka jingpharep jong ka Canada bad ka la kyntait jur ruh ba kam shym phah ïano- ïano ruh na ki briew jong ka India ban leit pyniap ne ban ïadon bynta ha katei ka jingleit thombor ia utei u lehnoh khatam ba ka jia hapoh u pud- u sam jong ka ri Canada hi.
Ha katei ka step, la ong ba ki kynhun jong ka tnat NIA ki la leit ban khynra ha kumba 50 tylli ki jaka kiba la ioh jingtip ba ki long ki thaiñ kiba hap hapoh ka jingsynshar jong u runar Lawrence Bishnoi bad u Arshdeep Dalla uba dei hi napoh Canada, ha kaba ki pulit ki la ioh kurup ruh ia shibun ki tiar siat bad ki jingdon jingem jong kitei ki kynhun runar bad kynhun lehnoh na kitei ki thaiñ ba la ioh ban leit khynra.
Katkum ka jingtip jong ka NIA, la ong ba ki runar ba shyrkhei kum u Dalla bad u Gaurav Patial, ki ju im beit shabar hynrei ki don pat ka jingiadei kaba jan bad ki ju iatrei lang bad ki lehnoh Khalistan haba iadei bad ka jing pynpoi ia ki tiar siat bad kumjuh ruh ban phah thombor ha ki bynta jong ka India.
La ong ba ka NIA ha kane ka sien ka la ioh ban leit khynra ha kiba bun ki bynta jong ka jylla Punjab, Haryana, Rajasthan, Uttar Pradesh, Uttarakhand bad kumjuh ruh ha katto- katne ki bynta jong ka nongbah Delhi. Katba la ong ba dei tang ha Punjab ba ka NIA ka la leit ban khynra haduh 30 tylli ki jaka.
Ka NIA ka la mudui ruh da ka mukotduma ia katto katne ki runar kiba suba don kti bad kitei ki kynhun lehnoh na kitei ki ri kynthup ia u Bishnoi, Goldy Brar, Vikram Brar, Bambiha, Kaushal Chaudhary, Neeraj Bawana, Dilpreet bad u Sukhpreet alias Budha.
Napdeng jong kitei ki runar ba shyrkhei, u Bishnoi u don hapoh ka patok ha Ahmedabad bad u Dalla pat u don ha Canada.
Ka NIA ha kane ka taiew ba la leit, ka la ioh kurup ruh ia bun tylli ki jingdon-jingem kiba dei trai jong u Panjun hapoh Chandigard bad Amritsar. Ia u Pannun, ka NIA ka la thwet naduh u snem 2019 halor ka jing-iadon kti bad ki kam thombor jong ki lehnoh bad u la shah pynngat haduh 22 tylli ki kyndon pynkheiñ aiñ tang hapoh Punjab.
