Shah khang lynti ki nongïakhih ba thmu leit thombor ïa ka jaka sah u Myntri Rangbah ka Manipur

Imphal, Nailur:

Ki jingïakhih halor ka jingshah rahbor bad ka jingshah pynïap jong arngut ki khynnah skul ha Manipur ha ka sngi Palei ka la jur bha naba ki nongïakhih ki la pyrshang ban tur sha ka jaka sah jong u Myntri Rangbah u N Biren Singh. Kumba la ïathuh ki heh pulit, la ong ba ki nongïakhih kiba la thmu ban thombor pyrshah ïa ka jaka sah jong u Myntri Rangbah, ki la ïapynibor pyrshah bad ki pulit kiba la pynjur ïa ka jingpahara.

Ki kynram kynram ki la sdang ban jur biang ha Imphal naduh ka sngi Ba-ar hadien ba ki nongshong shnong ki la ïamih paidbah ha ki lynti ki syngkien ban pyrshah halor ka jingshah pynïap jong ki arngut ki khynnah pule Meitei ha kaba ki la dawa ïa ka jingpyntreikam ban pynshitom da kaba tyngeh pyrshah ïa ki riewbymman kiba la shim ïa ka jingim jong ki.

Ha kaba ïadei bad ki jinglong jingman ha ka jylla, kiba bun ki kynhun bad ki seng saiñ pyrthei ki la kdew kti pyrshah ïa ka sorkar kmie ka bym shym la lah ban leh ei ei ha kaba ïadei bad ki jingïakynad kiba la mih ha Manipur ha kaba ka la neh la san bnai.

Ka seng Congress ruh ka la kynthoh jur ïa ka sorkar kmie halor ki kynrum-kynram kiba la mih ha Manipur, ha kaba la ong ba ka jingdon jong ki jingïakynad ha ka jylla ka la ïai bteng, hynrei na ka bynta ka sorkar jong u Narendra Modi la kheiñ ba ki jinglong jingman ha ka jylla ki la ïaid beit ïaid ryntih.

Kumba ka paw mynta, la ong ba ki jingïai bteng jong kine ki kynrum kynram ki la long namar ka jingkheiñ sting jong ka sorkar kmie ka bym shym la lah ban tehlakam ne ban pynibor pyrshah ïa ki riewshim kabu kiba la nang aiding bad nang pynjur ïa ki jingïakynad.

Ha kane ka sien kaba mynta, ki nongïakhih ki la shah khang lynti ha ki kynhun pahara ha kaba kane ka la wanrah ïa ka jingïakynad kaba jur.