Bengaluru, Nailur:
Ka jingbuh hukum jong ka Cauvery Water Regulation Committee ïa ka Karnataka ban pyllait ïa ka um sha Tamil Nadu yn sa pynibor pyrshah hakhmat ka Supreme Court, la ong u Myntri Rangbah jong ka jylla u Siddaramaiah ha ka sngi Balang.
Ka kynhun jong ki nongbishar ka la hukum ïa ka Karnataka ba kan pyllait um da kumba 3,000 Cubic Feet ha ka 1 second (cusecs) sha ka jylla ba marjan kaba la long naduh ka 28 tarik, Nailur haduh ka 15 tarik, Risaw.
U Siddaramaiah u la ong ba u la ïakren bad ka kynhun ba dei khmih halor ki aiñ ki kanun ha ka jylla, ha kaba ka la ong ba kan sa pynibor hakhmat ka ïingbishar bahakhliehduh.
“Ngi pynibor pyrshah halor ka hukum jong ka Regulation Committee hakhmat ka Supreme Court. Ngim don um ban ai,” la ong u Myntri Rangbah ha ka jingïakren bad ki nongthoh khubor ha Male Mahadeshwara Hills kaba don ha kane ka distrik.
U Symbud Myntri Rangbah u D K Shivakumar ha ka sngi Ba-ar u la pynpaw ïa ka jingsngewskhem halor ka jingkyntait jong ka CWRC ïa ka jingkyrpad jong ka Tamil Nadu, kaba la kwah ïa ka Karnataka ba kan pyllait da kumba 12,000 cusecs ka um.
