Imphal, Risaw:
Ka Manipur Pradesh Bharatiya Janata Party ka la phah da ka shithi sha u President jong ka seng BJP ha ka ri u JP Nadda ha kaba la kyrpad ïa ka sorkar kmie ba kan pynphai bad ban pynbiang jaka sah na ka bynta kito ki briew ki bym don jaka sah shuh ha ki shnong trai jong ki bad ban pynbiang ka bai lutksan na ka bynta kito kiba la duhnoh ïa ki ïing ki sem bad kumjuh ban ai jingkyrshan pisa na ka bynta kito kiba la mynsaw bad ïap ha ka jingïakynad kaba la jia ha ka jylla.
Shuh shuh, la ong ba ka seng BJP ha Manipur ka la dawa ba la dei ban pyntreikam ïa ka SoO (Suspension of Operations) Ground Rules bad ka jingpynkheiñ ïa kine ki kyndon kan sa shah ñiew kum ka kam pyntriem jong ki lehnoh.
Ka seng BJP ha Manipur ha ka shithi ba ka la phah sha u JP Nadda ka la kdew kumne, “Weng bad pyndam noh ïa ka Article 355 lada dang don ei ei ban pyntreikam ha ka jylla bad ban buh ïa ka hukum jong ka Unified Command ïa u Myntri Rangbah ka jylla ha kaba yn sa lah ban pyntreikam da ka jingsngewskhem bad ka jingshaniah ïa ka sorkar ha kaba ïadei bad ki jinglong jingman.
