New Delhi, Risaw:
U Myntri Rangbah jong ka Delhi u Arvind Kejriwal ha kine ki khyndiat sngi ba la leit u la ong ba ka jingjaboh kumba la khmih bniah ka la kham duna ha ka nongbah ha ka por ba u la pynbna ïa ka jingthmu pyntreikam jong ka aïom Tlang ka ban tehlakam ïa ka jingjaboh.
Ha kiba bun ki sngi la sakhi ïa ka jingjaboh kaba jur ha kaba kane ka lah kham duna ha ki phra snem ba la leit namar ka jingdon jong kiba bun ki rukom pyntreikam ba la wanrah da ka sorkar, kum ka jingwanrah ïa ki bos Electric bad ka EV Policy, napdeng kiba bun kiwei pat, u la ong ha ka jingïalang jong ki nongthoh khubor.
Ha ka jingpynbna ïa ka jingthmu pyntreikam jong ka aïom Tlang, u Kejriwal u la ong ba ka Pusa Bio-Decomposer kaba la ïada na ka jingthang ñiut yn sa kynshait ha ka jaka kaba heh da kumba 5,000 hectares jong ka jaka rep ha une u snem pyrshah ïa ka 4,400 hectares jong u snem ba la dep.
Ka Pusa Bio-decomposer, ïa kaba la wanrah da ka Indian Agricultural Research Institute (IARI) ha Delhi, ka dei ka Microbial Solution kaba lah ban pynkylla ïa u jyntang kba sha ka sboh ha ki 15-20 sngi.
Ka jingïakhun jong ka sorkar Delhi halor ka jingjaboh jong ka lyer ha ka nongbah ka la ïai bteng na ka por sha ka por ha kaba ka sorkar kam shym la shongthait.
Ka jingthmu jong k sorkar ka long ban wanrah ïa ka khuid ka suba ha ka nongbah hi baroh kawei khnang ba kan ym ktah ïa ki nongshong shnong hapoh jong ka.
Ka sorkar Delhi mynta ka la don jingkyrmen ba kan sa nang lah ban trei shitom ha ka ban wanrah ïa ka khuid ka suba ha ka nongbah bad kumjuh ban pyntikna ba nangne shakhmat kan sa wad ïa ki lad ki lynti ban pyntreikam halor ka jingthmu ban wanrah ïa ka jingkhuid bad ka jingpynkhuid ïa ka lyer.
Shuh shuh u Kejriwal u la don ka jingkyrmen ba nangne shakhmat da ka jingïatreilang jong baroh yn sa lah ban wanrah ïa ka jingkhuid ha ka nongbah ha baroh ki liang ha kaba yn sa pynthymmai ïa ki rukom pyntreikam.
