New Delhi, Risaw:
Kum shi bynta ban pynrem jur halor ka jingshah kem jong u MLA ka Congress ha Punjab u Sukhpal Singh Khaira ha kaba ïadei bad ka jingshah kynnoh donkti ha ka kam khaïi drok, ka seng Congress ha kine ki khyndiat sngi ba la leit ka la ong ba ka seng kan sa ïai bteng ban pyrshah halor kum kine ki jingleh kam saiñ pyrthei pyrshah ïa ka liang pyrshah hynrei u la pynthikna ba kane kan ym ktah ïa ka jingïatreilang jong ka kynhun INDIA, ha kaba ka seng AAP kaba bat ïa ka jingsynshar ha Punjab ruh ka la donlang ha ka kynhun.
Ka nongaiktien jong ka seng Congress ka Supriya Shrinate ka la ong, ka jingshah kem jong u MLA ka long kaba sngewlehraiñ bad kynthoh jur halor ka jingleh kam saiñ pyrthei bad kyrmen ba kin sa don ki jingthmu bad ka sur ba mih hapoh ka seng Aam Aadmi Party (AAP) kan treikam halor jong ka.
“Lada don ka jingleh donbor halor ka hok ban kren laitluid bad kano kano ka kam leh donbor pyrshah ïa ka liang pyrshah, kaba long da ka jinglehkam saiñ pyrthei, la dei bad dei ban pynrem jur. Ngi buh ka jingpynrem jur halor ka jingshah kem jong u Khaira. Um shym long tang u MLA hynrei u la long ruh u heh nongïalam jong ka Kisan Congress bad nga buh ka jingkyrpad ba kiba bun ki riewpyrkhat hapoh ka seng Aam Aadmi Party kin pynpaw ba kim dei ban pynlong ïa ka sorkar Punjab ba kan leh kam saiñ pyrthei kumba ka la leh,” ka la ong ha ki nongthoh khubor haba ki la kylli jingkylli ïa ka shaphang ka jingshah kem jong u MLA jong ka seng Congress.
Ka la ong ba ka jingshahkem jong u Khaira” ka long ka jingpynrem jur bad ka jinglehraiñ” bad bynrap shuh shuh da kaba ong ba ka seng Congress kan sa ïai pyrshah lada don ki jingleh kam saiñ pyrthei pyrshah ïa ka liang pyrshah.
