Kolkata, Risaw
Ki briew ha Kolkata khamtam kiba shong ba sah ha ka thaiñ New Town, shen kin sa ïoh ïa ki jingdonkam jong ki kum ki dawai, ki mar bam bad ki jait jingbam ba bun jait hakhmat khyrdop ïing da ka jingïarap jong ki Drone naba ki kynhun kiba pyntreikam halor kane ka bynta ha Delhi ki la thmu ban leh ïa kane ka kam da ka jingïarap jong ki heh sorkar hapoh ka thaiñ.
U Capt Eshaan Khullar, uba long u Associate Vice President jong ka Skye Air Mobility Pvt Ltd, u la ong ba kane ka kompeni ka la dep ban ïasoi bad ki dkhot jong kumba 10 -12 tylli ki kynhun jong ki longïing kiba sah ha New Town na ka bynta ka jingpyntreikam, naba ki Drone kin sa ïarap ban kham pynduna ïa ka jingshim por ha ka ban leit pynpoi ïa ki mar ne ki jingbam.
“Ngi kwah ban sdang ïa kane bad ka New Town bad hadien kane ngin sa sdang sa ha Salt Lake bad kiwei pat ki bynta jong ka Kolkata, nalor ka jingleit sha ki thaiñ nongkyndong kiba ju ïakynduh jingeh na ka jingbym don ki surok ïaid kali,” la ong u Khullar ha ka jingïakren bad ki nongthoh khubor.
U la ong ruh ba ka kompeni kan sa jam shakhmat na ka bynta ban ïatreilang bad kiba bun ki heh ba dei khmih naba ka New Town Kolkata Development Authority (NKDA) ka la pdiang ruh na ka bynta ban pyntreikam da ki Drone ha ka ban pynpoi ïa ki jingdonkam ha kylleng ki bynta jong ka Kolkata bad kumjuh ha baroh kawei ka jylla West Bengal.
