Guwahati, Risaw:
Ka kynhun Central Bureau of Investigation (CBI) ha ka Sngi U Blei ka la ïoh ban kem ïa 4 ngut ki briew, kynthup ïa arngut ki kynthei na Churachandpur kaba don ha Manipur ha kaba ïadei bad ka jingjia jong ka jingshah rahbor bad ka jingshah pynïap jong ar ngut ki khynnah pule Meitei.
“Nga dap da ka jingsngewkmen ban pyntip ba ki la don kumba katto katne ngut ki runar ïa kiba la donkti ha ka ban rahbor bad pynïap ïa u Phijam Hemanjit bad ka Hijam Linthoingambi kiba la shahkem na Churachandpur mynta ka sngi,” la ong u Myntri Rangbah jong ka jylla u N Biren Singh ha ka jingthoh kaba u la phah lyngba ki lad phah khubor.
“Kumba la ïathuh, la ong ba kine ki la phetrieh hadien ba ki la dep ban leh ïa kane ka kam pyntriem, hynrei kim lah ban lait na ki kti jong ka aiñ,” la bynrap u Singh.
U la ong ba ka sorkar ka la leh ïa kaba donkam na ka bynta ban pynshitom da kaba tyngeh pyrshah ïa kine ki briew ha kaba yn sa kynthup ruh da ka rai ban pynïap ïa ki ha ki kti jong ka aiñ, namar kine ki kam pyntriem ba ki la leh.
Kumba la ïathuh, la ong ba ka kynhun CBI, ha ryngkat ka jingïarap jong ki pulit ka Manipur bad ki shipai jong ka tnat Army, ki la lap ïa kawei ka Bolero ha kaba kine ki saw ngut ki la shong halor ka jingthmu jong ki ban leit sha Henglep Subdivision ha ka por shiteng sngi.
Ar ngut ki khun kynthei kiba dang don hapdeng ka rta kaba 9 bad 11 snem jong kawei na kine ki longkmie ba la shah kynnoh donkti, ki la donlang ha kane ka kali.
Kumjuh, kine baroh 6 ngut ki la shah ïalam sha ka kad liengsuiñ jong ka Imphal ha ka Helicopter jong ki Army.
Kine kiba la shahkem kin sa shah ïalam hakhmat ka Competent Court ha Guwahati kumba la hukum da ka Supreme Court, la ong ka jingthoh ba la wan na ka kynhun CBI.
Shuh shuh ka la bynrap da kaba ong ba ïa kine ki arngut ki khynnah kiba dang rit la aiti sha ka District Child Protection Officer, Kamrup Metro District na ka bynta ka jingbha bad ka jingïada ïa ki.
Kumba la ïathuh ka tyllong khubor, la ong ba ka kynhun CBI ka la khmih bniah ïa ka phone jong iwei napdeng kine kiba la shah pynïap, bad lap ba ïa kane ka Phone la pyndonkam da kine kiba la shah kynnoh donkti ha ka kam pynïap briew.
U Hemanjit (20) bad ka Linthoingambi (17) ki la jah na ka ïingsah jong ki ha u bnai Naitung haba la jur bha ka jingïakynad ha Manipur.
Ka khubor jong ka jingshah pynïap jong ki ka la pur hadien ba la saphriang ki dur ba la pyni ïa ki metïap jong ki ha ki lad phah khubor hadien ba la pyllait noh ïa ka jingpynsangeh treikam ïa ka Internet hadien saw bnai ba la khang pyntreikam ïa ka.
