Guwahati, Risaw
Ka ïingbishar ha Delhi ha ka Sngi Ba-ar ka la pynjlan sngi shuh shuh ban phah set ha kti jong ka kynhun NIA ïa u runar uba la shah kynnoh donkti ha ka ban wanrah ïa ki jingïakynad bajur ha Manipur.
U nongbishar bakyrpang jong ka kynhun NIA u Sachin Gupta u la ai jingbit ïa kane ka kynhun tohkit ba kan bteng ban tohkit ïa u Seiminlun Gangte sa na ka bynta ki phra sngi.
U Sangte u la leit ban mih hakhmat ka ïingbishar ha ka sngi ba kut ka jingtohkit kaba ar sngi na ka bynta jong u.
Kumba la ïathuh ka kynhun NIA, la ong ba u Gangte u la shahkem ha kaba ïadei bad ki jingjia jong ka jingwanrah ïa ki jingïakynad kiba la long shi bynta da ka jingïasuhbuit sniew bad ki kynhun lehnoh kiba ha Myanmar bad Bangladesh ban hiar thma pyrshah ïa ka sorkar India da kaba shim kabu ban pynjur ïa ki kam pyntriem ha Manipur.
Ïa une u briew la kem ha ka sngi Saitjaiñ na Manipur bad la ïalam ïa u sha Delhi kumba ka la long na ka jingkwah ban pynkynriah jaka ïa u ha kaba ïadei bad ka jingtohkit.
Ka kynhun tohkit jong ka sorkar kmie ka la buh jingmudui mukotduma pyrshah ïa une uba la shah kynnoh hapoh ka Anti-terror law, ka Unlawful Activities (Prevention) Act (UAPA), bad kiwei pat ki aiñ.
Ïa kane ka mukotduma la mudui hi hashwa da ka kynhun NIA ha ka 19 tarik, Naitung, ha Delhi.
