Bhopal, Risaw:
Ki la don palat 100 ngut ki khynnah pule jong ka Lakshmibai National Institute of Physical Education (LNIPE) ha Gwalior kaba don ha Madhya Pradesh kiba la kem pang namar ka jinglong bih jong ka jingbam kaba ki bam ha ka miet jong ka sngi Ba-ar.
Napdeng palat 100 ngut ki khynnah, ki la don kumba 70 ngut kiba la ïoh dawai, palat 25 ngut ki la ïoh da ki IV drips bad kumba 2 ngut ki la don ka jingkyiuh ka met ha kaba ïa kine la ai ka jingsumar kaba biang, la ong u Registrar jong ka LNIPE u Amit Yadav ha ka jingïakren bad ki nongthoh khubor.
Hadien ba ki la ud shitom, ïa kine ki khynnah pule la pynkit mar mar sha Jayarogya Hospital kaba dei ka hospital sorkar ha ka miet jong ka sngi Ba-ar.
Ha ka jingïakren bad ki nongthoh khubor, u Superintendent jong ka Jayarogya Hospital u Dr RKS Dhakad u la ong ba iwei napdeng kine ki khynnah pule i la kham shitom jur.
Kine ki khynnah kiba la kem pang ki dei kiba hapdeng ka rta kaba 18 haduh 25 snem. U Dhakad u la ong, “Hynnin ka miet ngi la ïoh ka khubor shaphang kane ka jingjia ha LNIPE. Ngi la sdang ban pynkhreh ïa ki jingdonkam baroh. Ki nongtrei jong ngi ki la pynbiang ïa ki jingdonkam ban ai jingsumar ïa kiba ïoh kum ïa kine ki jait jingpang. Ngim don shibun ki jingthiah. Ngi la ïaleh ban pynbiang ïa ki jingthiah katba lah.”
Ki bor bahalor ki dang phah khmih bniah ïa ka jingbam ba kine ki khynnah ki bam khnang ban tip ïa ka daw tynrai baroh.
