Aizawl, Risaw:
U KT Rokhaw, ïa uba la shahjied ban long u dkhot jong ka Legislative Assembly (MLA) na Palak konstitwensi ha Siaha distrik na ka tiket jong ka seng Congress, u la iehnoh kam ha ka sngi Ba-ar.
Ïa ka shithi iehnoh-kam jong u la phah sha u Lamphang jong ka Ïingdorbar, u Lalrinliana Sailo.
Ka rai jong u Rokhaw ban iehnoh kam ka la long hashwa ka ilekshon ban wan, ha kaba u la thmu ban ïakhun na Palak konstitwensi sa shisien pat, hynrei ha kane ka por ba mynta un long u kyrtong na ka seng Mizo National Front (MNF).
Ha ka jingïakren bad ki nongthoh khubor, u KT Rokhaw u la ïathuh ba ka rai jong u ban leit ban pynïasoh bad ka seng MNF ka la long hadien ba u la shah khot shah wer ha kane ka seng.
U la ïakren bad ïamir jingmut ruh bad ki dkhot jong ka konstitwensi jong u, ha kaba kine ki la ai jingmut ba un leit ban pynïasoh bad ka seng MNF.
