Imphal, Risaw:
Ki shipai ïada kiba la pynlong ïa ka jingleit khynra ha ka 3 tarik, Risaw ha ki thaiñ ba kham ap jingma jong ka Manipur ki la ïoh ban kurup ïa ki tiar siat bad ki bom pynbthei. Ïa ka jingleit khynra la pynlong ha Bishnupur, Kakching, Thoubal bad Imphal-West distrik bad ïoh ban kurup ïa ar tylli ki tiar siat, lai tylli ki song kuli, uwei u bom pynbthei bad ar tylli ki Tube Launcher.
Kumba la ïathuh ka tyllong khubor, uwei u briew uba la jah ïa uba la tip kyrteng kum u Satkhothang Kipgen ruh la ïoh da ki shipai ïada khappud ha ki bynta jong ka surok bah kaba don ha ka shnong Lonjang, kaba hap hapoh ka Kangpokpi distrik ha ka 3 tarik, Risaw. Kumba la ïoh khubor, la ong ba une u briew u la jah naduh ka 30 tarik, Nailur.
