Itanagar, Risaw
U Myntri Rangbah jong ka Arunachal Pradesh u Pema Khandu u la pynpaw ka jingsngewsih bad ka jingsngewlem halor ka jingshlei um bad ka jingduh jong kiba bun ki mynsiem briew ha Sikkim.
Une Myntri Rangbah u la phah ka jingsngew-lem sha ki longïing jong kito kiba la duh noh ïa ki baïeid-bathoiñ ha ki thaiñ ba la shah ktah jur na ka jingjur slap kaba la wanrah ïa ka jingshlei um. Na ka liang jong u u la buh jingduwai na ka bynta ban ïoh pyllait im ïa ki shipai kiba dang jah.
“Ka long kaei kaei kaba sngewsih ban tip ïa ka khubor jong ka jingïakynduh jingeh jong ka Sikkim na ka daw jong ka jingshlei um. Ka jingduhnoh jong kiba bun ki mynsiem briew ka la pynkyndit bad pynkhuslai. Ka jingsngewlem jong nga ka leit sha ki bahaïing jong kito kiba la ïohmad ïa kine ki jingeh. Ka jingduwai na ka bynta ban ïoh pyllait im ïa ki shipai kiba la jah,” la ong u Myntri Rangbah ha ka jingthoh ba la phah lyngba ki lad phah khubor.
Haduh ba la thoh ïa ka khubor ki la don kumba 14 ngut ki briew kiba la ïap bad 102 ngut kiwei pat, kynthup ïa 22 ngut ki shipai ki dang jah hadien ka jingther jong u lapbah uba la pynshlei ïa ka nan Lhonak Lake ha North Sikkim kaba la wanrah pat ïa ka jingshlei um ha ka wah Teesta, la ïathuh ki heh pulit hynnin ka sngi.
Haduh ba la thoh ïa ka khubor ki la don kumba 2,011 ngut ki briew kiba la shah pyllait im na ka jingshlei um, kaba la jia ha ka sngi Balang ha kaba ka la ktah ïa kumba 22,034 ngut ki briew, la ong ki heh jong ka Sikkim State Disaster Management Authority (SSDMA) ha ka jingpyllait khubor jong ki.
Ka sorkar jylla ka la buh ïa kumba 26 tylli ki jaka sah ba shipor ha ki saw tylli ki distrik, ka la ong. Baroh ki la don kumba 1,025 ngut ki briew kiba la leit sah ha ki 8 tylli ki jaka sah ba shipor kiba don ha Gangtok distrik, katba ha ki 18 tylli kiwei pat ki jaka sah ba shipor ym pat lah ban tip tikna ïa ka jingdon jong ki briew kiba la leit ban pynlong jaka sah.
