Imphal, Risaw:
Ka jingïakynad ka la bteng biang ha Imphal West distrik kaba ha Manipur ha kaba ki la don kumba ar tylli ki ïing kiba la shah thang da ka ding bad ka la don ruh ka jingsiat kuli kaba la long da bun sien, la ïathuh ki pulit hynnin ka sngi.
Kane ka jingjia ka la jia ha New Keithelmanbi kaba hap ha ka thaiñ ba dei khmih ki pulit jong ka Patsoi ha ka por kumba 10 baje mynmiet jong ka sngi Balang, ki la ong. Hadien ka jingthombor, ki runar kiba la donkti ki la phet noh na kane ka jaka, ha kaba kane ka jingjia ka la wanrah ïa ki kynrum kynram bad ki jingïakynad, la bynrap shuh shuh ki pulit.
Ki shipai ïada bad ki pulit pahara ki la pynkhlaiñ ïa ka jingpyntreikam khnang ban lah ban tem ïa ka jingïakynad, la ïathuh ki pulit. Ka kynhun jong ki lehkmie Meitei kiba la ïalum ha katei ka thaiñ hadien ba la jia ka jingjia, ki la shah khanglad noh ha ki pulit ïa ka jingthmu jong ki ban nangpynjur ïa ka jingïakynad, la ong ki pulit.
Ka jingpahara jong ki pulit ka dang bteng ha ka thaiñ khnang ban tehla-kam ïa ki jinglong jingman bad ban khanglad ïa ki jingïakynad kiba jur ki ban jia khamtam hadien kane ka jingjia jong ka jingshah thang ïing.
