Imphal, Risaw:
U Chief Secretary jong ka Manipur u Dr. Vineet Joshi, ha ryngkat ki lai ngut ki dkhot jong ka kynhun kaba la shah thung ha ka Supreme Court ba la lamkhmat da ka nongbishar barim jong ka Jammu & Kashmir jong ka High Court ka Gita Mittal, ki la leit jngoh ha kine ki khyndiat sngi ba la leit ïa ka Kangpokpi na ka bynta ban khmih bniah halor ki jinglong jingman ha kane ka distrik kaba la shah ktah jur na ka jingïakynad.
Kumba la ïathuh ka tyllong khubor, la ong ba ha kane ka kynhun jong ki lai ngut ki dkhot ka kynthup ruh ïa ka nongbishar barim jong ka Bombay High Court ka Shalini Phansalkar Joshi bad ka nongbishar barim jong ka Delhi High Court Judge ka Asha Menon.
Ka Supreme Court ka la thung ïa lai ngut ki dkhot jong ka kynhun ki ban khmih bniah halor ki jingduh jingjulor na ka bynta ka jingthmu ban pynbiang ïa ki jingdonkam bad ki jingai jingïarap kiba kynthup ruh ha ka ban ai jaka sah shipor ïa ki lanot, ka jingpynshna biang ïa ki ïing ba la shah pynjulor jong ki bad kiwei pat ha Manipur.
Ki dkhot jong kane ka kynhun ki la shah pdiang burom ha ki heh nongpynïaid distrik, ba la lamkhmat da u Deputy Commissioner u Mahesh Chaudhari, ha ka jaka treikam jong u Deputy Commissioner.
Ha ka jingleit jngoh bad jurip bniah jong ki, kane ka kynhun ka la ïakren sani bha halor ki jinglong jingman bad ki heh nongpynïaid distrik.
Hadien ka jingïalang, ka kynhun ha ryngkat ki heh nongpynïaid distrik ki la leit ban jurip bniah ïa ki ar tylli ki jaka ba la sah da ki lanot ha Keithelmanbi High School bad DIET Centre, Leikop, kiba hap hapoh ka Champhai sub-division bad ïakren bad ki briew kiba la sah ha kine ki jaka.
Ha kawei pa kawei na kine ki jaka sah jong kine ki lanot ki la don palat 500 ngut kiba la pynlong jaka sah hapoh jong ki.
Kane ka kynhun ka la leit khmih bniah ruh ïa ki ïing ba dang shna kiba don ha Keithelmanbi, ha kaba la thmu ban shna shuh shuh sa palat 150 tylli, la ong ka kaiphot. Shuh shuh la ïathuh ba kane ka kynhun ka la sam ruh ïa ki jingdonkam sha ki lanot kiba la sah ha kine ki jaka sah ba shipo ba la buh na ka bynta jong ki.
