Shillong, Risaw 08
Ki thei ïalehkai ka Meghalaya ka la shah pynliem noh ha ki ‘thei ïalehkai ka Uttar Pradesh ha ka jingïalehkai jong ka lympung ïalehkai Junior Girls’ National Football Championship 2023-24 kaba la long ha ka Sngi U Blei.
Haba phai sha ka jingïalehkai kaba la long ha madan Royal FC Stadium, ki ‘thei ka Meghalaya ki la shah pynliem noh da 3-1 kol ha kane ka jingïalehkai. Ïa ka kol ba nyngkong ha kane ka jingïalehkai la thep da ka Rukmani ha ka minit ba 63 na ka bynta ka Uttar Pradesh bad ha ka minit ba 74 kane ka ‘thei ïalehkai ka la khyrwit sa ïa ka kol kaba ar.
Ha ka minit kaba 83 ka Eightfulnes Shangdiar ka la ïoh ban pynphai shi kol na ka bynta ka Meghalaya hynrei kane kam shym la biang bad mar mar, ka Uttar Pradesh lyngba ka Sarita ka la khyrwit syndon ka kol kaba lai.
Ha kane ka jingïalehkai, ka Shalini Verma jong ka Uttra Pradesh ka la ïoh khur ïa ka nam ‘Player of the Match’ hadien ba ka la lah ban ïalehkai bha bad pynlong ruh ïa la ka kynhun ban khur ka jingjop kaba suk.
Lah ban pynkynmaw ba ki ‘thei ka Meghalaya ha ka jingïalehkai pyrshah ïa ka Jammu & Kashmir, ki la jop da 11-0 kol hynrei ha kane ka kynti ba mynta pat, kim shym la lah satia ban ïalehkai bha bad ha kaba kut ban mad noh ka jingshah rem.
