Guwahati, Risaw:
Ka nongbah Guwahati, ka la shah ktah jur na ka jingthombor jong ki bor ka mariang na ka jingjia jong ka jingtwa khyndew kaba la ktah jur ïa ka Milan Nagar No. 2 jong ka Hengrabari, ha kaba kane ka la kyndang ïa ki mawlong na ki jaka lum ha ka miet jong ka sngi Thohdieng.
Kane ka jingjia ka la ktah shibun namar ka jingshah pynmynsaw jur jong ki lai ngut ki nongshong shnong kiba la mynsaw na ka jingtyllun jong ki maw.
Napdeng kine kiba la mynsaw, arngut ki dei ki shynrang bad kawei ka longkmie, ïa kine baroh la pynkit noh sha Gauhati Medical College and Hospital (GMCH) ha kaba ki la kham shitom jur.
Ki nongsumar ki la pynsted ïa ka rukom ai jingsumar ïa kine ki lanot ha kaba ki la pyrshang ban pyllait im ïa ki.
Kane ka jingjia ka la ktah ruh ïa ki jaka ba marjan ha kiba bun ki thaiñ ha kaba ka la pynjulor ruh ïa ki katto katne tylli ki ïing.
Kiba bun na ki nongshong shnong kiba la duh jaka sah ki la phai sha ki bor ba dei khmih ban ai jingïarap na ka bynta jong ki ha ka ban ai jaka sah shipor namar ki jingshah pynjulor ki ïing ki sem jong ki.
Kane ka jingjia ka la long na ka jingjur palat jong u slap uba khlem sangeh ha kaba ka la pynshlei um ïa ka nongbah Guwahati.
Ha kaba ïadei bad ka jingshlei um, ki nongshong shnong jong kiba bun ki thaiñ ki la ïakynduh jingeh khamtam ha ka leit ka wan jong ki, naba kiba bun ki lynti ïaid kjat bad ki surok ki la shah tap ha ka um ha kaba ka dang ïai bteng haduh mynta.
