New Delhi, Risaw:
Ka sorkar kmie ka la mynjur ban ai ka jingïarap lyngba ka song tyngka kaba T. 44.8 klur na ka bynta ka jylla Sikkim kaba la shah ktah na ka jingshlei um kaba shyrkhei.
U Myntri jong ka sorkar kmie uba dei khmih ïa ka tnat ki kam pohïing u Amit Shah u la mynjur ban pyllait ïa ka song tyngka kaba T. 44.8 klur na ka bynta ban pynbiang ki jingïarap sha ki lanot kiba la shah ktah na ka jingshlei um.
Ïa kane ka jingïarap na ka sorkar kmie yn sa puroi na ka State Disaster Response Fund (SDRF) sha ka Sikkim. Shuh shuh la ïathuh ba ka sorkar kmie ka la buh ruh ïa ka kynhun Inter-Ministerial Central Team (IMCT) ban lah ban kheiñ halor ki jingjulor ba la wanrah na ka jingbthei kynsan ka nan kaba la pynjur ïa ka jingshlei um.
Lada khmih ïa ka jingshim jingkheiñ jong ka kynhun IMCT, yn sa ai shuh shuh ki jingïarap na ka sorkar kmie ka ban wan pat na ka National Disaster Response Fund (NDRF) na ka bynta ka Sikkim, la ong ka jingthoh kaba la wan na ka Ministry of Home Affairs (MHA).
