Shillong, Risaw 10
U Myntri Rangbahduh ka ri Narendra Modi u la ai jingïaroh ïa ka kynhun ïalehkai ka ri halor ka jinglah ban ïalehkai bha ha ka Asian Games kaba dang kut shen ha Hangzhou, China.
Haba pynpaw ha ka jingïalang kaba la long ha ka sngi Palei ha Major Dhyanchand Stadium kaba ha nongbah Delhi, u Modi u la pynpaw ka jingïaroh ïa ki nongïaleh-kai, ki coach bad physiotherapy nalor kiwei pat kiba la lah ban thaw rekod ha China.
“Na ka bynta ki 140 klur ki nongshong shnong, nga pdiang sngewbha ïa ki nongïalehkai. Namar ki jingtrei shitom jong phi bad ki jinglah ban kynjoh sha ka thong, ka long ka por kaba kongsan ban leh burom ha kylleng jong ka ri. Ngim ju lah ban sei ïa ki nongïalehkai ba don ia ki sap ba kyrpang namar kiba bun ki jingeh bad dei na kane ka daw ba ki nongïalehkai jong ngi kim shym la lah ban khur takma”, la bynrap u Modi ha katei ka jingïalang.
Kumba paw ha ka 19th Asian Games, ka India ka la khur 107 tylli ki takma bad kane ka long bun shah na ki 70 tylli ba la khur ha ka Asian Games kaba la long ha u snem 2018 ha Indonesia.
Ha katei ka lympung kaba la long ha China, ka India ka la khur 28 tylli ki takma ksiar, 38 ki takma rupa bad 41 ki takma rnong ha kaba ka la wan ha ka kyrdan basaw kata hadien ïa ka China (383 ki takma), Japan (188 ki takma) bad South Korea (190 ki takma).
Ha katei ka lympung ka India ka la lah ban thaw history ha ki jingïa-lehkai kum ka Equestrian bad badminton (men’s singles). Ka kynhun ki nongïalehkai ka ri ba kynthup ïa u Anush Agar-walla, Divyakriti, Sudipti Hajela bad Hriday Vipul ki la lah ban kamai 209.205 ha ka Team Dressage na ka bynta ban khur ïa ka takma ksiar kaba nyngkong eh ha ka equestrian ha ki 41 snem.
U khlur nongïalehkai badminton ka ri u HS Prannoy u la lah ban long u rangïalehkai ba-ar jong ka ri ban khur takma ha ka Asian Games ha ka liang ki shynrang kata hadien u Syed Modi, uba la khur ïa ka takma rnong ha ka Asian Games ha u 1982.
