Gangtok, Risaw:
Ki shipai ka tnat Indian Air Force (IAF) bad ki shipai ka tnat Army ha ka Lah Sngi U Blei ki la ïoh ban pyllait im ïa palat 390 ngut ki nongjngohkai pyrthei, kynthup ïa ki 13 ngut na Bangladesh, na Lachen bad Lachung ki jaka sor kiba don ha Sikkim kiba la ngat na ka jingshlei um ha ka wah Teesta.
Ka jingïap jong ki briew na ka jingshlei um kumba la ïoh jingkheiñ ha Sikkim ka la kiew sha ka 34 ngut, la ïathuh ki heh pulit ha ka jylla ha ka Lah Sngi U Blei, katba ki heh ba dei khmih jong ka jylla ba marjan ka West Bengal ki la ïathuh ba ki la don kumba 40 tylli ki metïap ïa kiba la ïoh ban khwai na ki bynta jong ka wah Teesta. Katkum ka kaiphot ba la phah, la ong ba ki la don kumba 10 ngut ki shipai ka tnat Army kiba la long ki lanot jong ka jingshlei um bad ka jingwad mynta ka long ïa ki 105 ngut ki briew kiba dang jah haduh mynta.
Ki lanot kiba la ngat ha ka jingshlei um ki kynthup ruh ïa ki phra ngut ki shipai ka tnat Army. Napdeng kine ki metïap ba la ïoh tam, haduh mynta la ithuh tang ïa ki 10 tylli, kynthup ïa ki 8 tylli kiba dei jong ki shipai, la ïathuh shuh shuh ka tyllong khubor.
Ki la don palat 5,000 ngut ki briew kiba la shah pyllait im ha kine ki 6 sngi ba la leit ha ka por ba ka la don ka jingpyntreikam ban pyllait im ïa ki lanot bad la ong ba ka bynta jong ka North Sikkim kam pat lah ban ïasoh bad kiwei pat ki thaiñ jong ka jylla namar ka jingbteng jong ka jingshlei um.
