Shillong, Risaw 10
Ka CISCE kaba dei ka shlem saiñ dur jong ka Minerva Public School kaba na Mohali ka la rah ïa ka nam lahduh ha ka kyrdan ïalehkai U-14 ki shynrang jong ka 62nd International Football Subroto Cup.
Kane ka nam jop ka la wan urlong hadien ba ka lah pynliem noh ïa ka Chawngfianga School kaba na Mizoram da 1-0 kol ha ka jingïakhun final kaba la long ha ka sngi Ba-ar ha Bengaluru.
Kane ka long ka jingjop kaba nyngkong eh jong ka CISCE ha baroh ki kydan ïalehkai jong ka Subroto Cup bad kane ka la wan urlong lyngba u MD Azam Khan uba la lah ban thep kol hashwa ba u rephri un pynwai noh ïa ka jingïakhun final.
Watla kitei ki kynhun ki la pyrshang ban ïakhun tyngeh naduh kaba sdang, hynrei kim shym la lah ban pynkhih jar. Hashwa ban kut artad ka jingïalehkai u Azam Khan u la ïoh ban thep kol da ka khlieh ha kaba u rangapkol ka Chawngfianga um shym la lah ban pyllait na ka jingshah thep.
