Guwahati, Risaw:
Ka jingïoh ban kurup ïa u drok Crystal Methamphetamine ha ki ar sngi lynter ha Mizoram ha kaba la kem ïa ki ar ngut ki nong Myanmar ha kaba ka jingkheiñ kyllum ïa ka dor jong kine kiba la ïoh ban kurup ka la poi sha ka T. 65 klur, ka la buh jingmaham ïa ki bor jong ka aiñ ba ki la dei ban pynkhlaiñ ïa ki rukom pyntreikam ha ki bynta khappud. Kine ki jingïoh ban kurup ïa u drok na ki ar tylli ki jaka, ka la long shi bnai hadien ka jingïoh ban kurup ïa u drok uba 3 kilo ïa kaba la lap da ka kynhun Anti-Narcotics Task Force jong ki pulit ka Mizoram.
U DGP jong ka Mizoram u Anil Shukla ha ka jingïakren bad ki nongthoh khubor u la pynpaw da kaba ong ba ka bynta kaba sngew khuslai eh ka long na ka jingïoh ban kurup ïa une u drok na ki nong Myanmar.
“Ki la don kumba lai tylli ki jingjia jong ki jingïoh ban kurup ïa u drok Crystal Meth ha u bnai ba la lah bad kaba kham sngew khuslai ka long namar ba la donkti da ki nong Myanmar, kiba long ki nongkhaïi drok bad kiba la pyndonkam da ki lynti ïaid na Mizoram. Ka la don ka ‘Free Movement Regime’ ka jingpyntreikam ha kaba la ailad ïa ki nong Myanmar ba kin ïaid khlem jingshah pyrkhing sha ka jingjngai kaba 16 km sha Mizoram, bad ki la don bun ngut ruh ki nongshong shnong jong ka Myanmar ïa kiba mynta ki dang shong dang sah ha ka jylla namar ka jingshah leh donbor ha Myanmar. Ngi la shim ïa ki sienjam ban ïaid shakhmat bad ka jingtrei shitom jong ngi mynta ka long ba ngin lah ban ïakhun pyrshah ïa u drok ha ka jylla,” u la ong.
