Shillong, Risaw 11
Ka jingïalehkai bha u Rohit Sharma bad u Virat Kohli ka la pynlong ïa ka India ban ïai bteng ïa ka jingjop kaba ar ha ka Cricket World Cup. Kane ka wan hadien ba ka lah ban pynliem noh ïa ka Afghanistan da 8 wiket ha ka sngi Balang ha nongbah Delhi.
Ha kane ka jingïakhun ka India ka la lah ban kynjoh sha ka thong hadien ba la lah ban kamai 273 run ha ki 35 over. U Rohit Sharma uba la shimti kum u kapten ïa kane ka kynhun, u la khyrwit 131 run na ki 84 bol kynthup ïa 16 tylli ki ‘four’ bad san tylli ki ‘six’. Katba u Virat Kohli u la khyrwit ïa ka shiteng spah da ïoh 55 run (6x4s) bad khlem shah pynhap wiket.
Ha kane ka jingïa-khun, ka Afghanistan kaba la shimti ban tied nyngkong, ka la kamai 272 run bad shah pyn-khyllew 8 wiket ha ki 50 over. U kapten kane ka kynhun u Hashmatullah Shahidi u la long u nongtied uba la ïoh bun eh da kaba kamai 80 run na ki 88 bol, katba u Azmatullah Omarzai u la khyrwit ïa ka shiteng spah kaba 62 run na ki 69 bol.
U nongkawang bol jong ka ri u Jasprit Bumrah u la lah ban khur 4 wiket bad ban ailad 39 run. Ïa ki ar wiket la khur da u Hardik Pandya, katba kiwei pat ki la noh synñiang ban khur mar shi wiket ki long u Shardul Thakur bad u Kuldeep Yadav.
Nalor u Rohit bad u Kohli, kiwei pat ki nongtied kiba la noh synñiang hak ka ban tied ki long u Ishan Kishan uba la tied 47 run na ki 47 bol bad u Shreyas Lyer uba la tied 25 na ki 23 bol na ka bynta ban pynlong ïa ka India ban kynjoh sha ka thong ha ki 35 over ha kaba ka la kamai 273 ruh bad shah pyn-khyllem 2 wiket.
Kham hashwa ka India ka la jop ïa ka Australia da 6 wiket. Te kumta ka India kan pynkhreh ïa ka jingïa-khun kaba lai pyrshah ïa ka Pakistan ha ka sngi Saitjaiñ (14 tarik).
