Guwahati, Risaw:
Ha kaba ïadei bad ka jingpyntreikam kaba la pynlong ha ka miet jong ka sngi Ba-ar, ki pulit jong ka Guwahati da ka jingjop ki la ïoh ban kurup ïa kiba bun ki pisa thok ne ka Fake Indian Currency Notes (FICN) kaba la kot sha ka T. 2,16,500 ha ryngkat ka kor shon ïa ki pisa thok ha ka por ba ki la ïoh ban kem ïa uwei u briew uba la donkti ha kane ka kam.
Hadien ba la ïoh jingtip halor kane ka jingdon kane ka pisa thok ka jingïatreilang jong ki pulit kiba na West Guwahati Police District bad Jalukbari Outpost ka la ïaid shakhmat ban pyntreikam ha kaba ïadei bad ka jing-leit ban kurup noh ïa ka pisa thok, ha kaba da kane ka jingpyntreikam la ïoh ban kem ïa u Mofidul Islam, uba la 29 snem ka rta uba dei u nongshong shnong jong ka thaiñ Bihpuriya kaba don ha Lakhimpur distrik.
Kane ka jingpyntreikam ka la long ha ka jaka ba marjan bad ka Bhupen Hazarika Samadjhi Sthal kaba don ha Jalukbari.
U Commissioner of Police, jong ka Guwahati, u Diganta Borah, u la batai shai kumne, “Hadien ba la pynlong ïa ka jingtohkit kaba bniah, la tip ba u nongïarap jong u Mofidul u Rofikuddin jong ka Laluk Islampur, Lakhimpur, u la pyntreikam ïa kawei ka kynhun na ka bynta ban pynïaid ïa ki pisa thok ha kawei ka ïing wai kaba don hajan Mirza Rail Gate. Na ka jingkhynra la lap ïa ka pisa thok kaba T. 2,16,500, kaba kynthup ïa ki 433 tylli ki pisa thok kiba don ha ka lut T. 500.”
