Shillong, Risaw 11
U rangïalehkai ‘dien ka Kerala Blasters u Aiban Dohling u lah ban duh ïalehkai ha baroh ki jingïakhun kiba dangsah jong ka Indian Super League (ISL) 2023/24 hadien ba ngat jingmynsaw ha ka jingïakhun pyrshah ia ka Mumbai City FC, kaba la jop da 2-1 kol ha ka sngi Ba-ar.
Une u rangïalehkai ka Jylla u la hap ban mih noh na masan ha ka jingïakhun pyrshah ïa ka Mumbai ha ka minit kaba 40 bad hadien ba u la shah sumar ki bor ba dei khmih katei ka klob ki la pynthikna ba kane ka jingmynsaw ka lah ban neh kham slem.
Utei u rangïalehkai ba dang 27 snem ka rta u la ïasoh sha ka Kerala Blasters hashwa ban sdang kane ka aïom ïalehkai hadien ba u la mih noh na ka FC Goa bad u la ïoh ban ïalehkai nyngkong ha kaba ka Kerala ka la jop ïa ka Bengaluru FC da 2-1 kol.
“Ka long ka por kaba eh ban wanphai biang na ka jingmynsaw ha kum kane ka por jong kane ka aïom ïalehkai. Ngan ym lah ban ïalehkai na ka bynta ka kynhun jong nga, ka Kerala Blasters ha ki jingïakhun ba dangsah jong ka Indian Super League,” la pynpaw une rangïalehkai ‘dien ha ka Instagram.
“Hynrei mynta ngan hap ban ai jingkyrshan lem ïa ka kynhun khnang ban kan lah ban ïalehkai bha ha kane ka lympung. Ngan pyrshang ban ïaleh katba lah khnang ba nga lah ban wanphai biang da ka jingkhlaiñ bor,” u la bynrap.
