Imphali, Risaw:
Ki la don baroh kumba 5,669 tylli ki tiar siat bad pynbthei bapher bapher bad da ki lak tylli ki jait kuli ïasiat ïa kiba la lute da kiba bun ki kynhun, ki riewpaidbah bad ki riewshimet hadien ba la jia ka jingïakynad kaba jur ha Manipur ha ka 3 tarik, Jymmang, bad haduh mynta ki la don kumba 1,344 tylli ki tiar siat ïa kiba la ïoh biang bad da ki hajar tylli ki kuli ïasiat la lap biang haduh u bnai Nailur, la ïathuh u heh pulit ha ka lah sngi U Blei.
U Chief Security Advisor sha ka sorkar Manipur, u Kuldiep Singh u la ong ba na ka bynta ban ïoh ïa ki tiar siat bad ki kuli ïasiat kiba dang jah haduh mynta, ka la don ka jingpyntreikam kaba la ïai bteng ha kylleng ki jaka jong ka jylla da ki pulit jong ka jylla bad kumjuh da ki kynhun jong ka sorkar kmie.
U la ong ba ka jingleit wad ïa kine ki tiar siat kaba la long sha ki thaiñ ba la jia ki jingïakynad bajur da ki shipai ka la ïarap ban pynïoh biang ïa kumba 11 tylli ki tiar siat, 20 song ki kuli, ar kilo u Gun Powder, uwei u 51 mm Mortar, uwei u bom kawang kti uba khleiñ bor, 10 tylli ki Improvised Mortar bad ar tylli ki Radio Set na Imphal East, Churachandpur bad Thoubal distrik ha ka jingleit khynra kaba la pynlong ha ki 24 kynta ba la leit.
Ka jingpyntreikam jong ka kynhun jong ki pulit ban leit jurip bniah sha kylleng ki jaka ba la jia ki jingïakynad bajur ka la ïai bteng.
Kane ka jingbteng jong ki pulit ban leit wad ïa kine ki tiar siat, ka long shi bynta ban tem bad ban khanglad ïa ki jingjia ki ba lah ban wanrah ïa ki jingjia kiba sngewsih khamtam ha kaba ïadei bad ka jingshah pynïap jong ki briew ha ka jylla.
Naduh ka 3 tarik, Jymmang ba la jia ka jingïakynad ki la don kumba 125 ngut ki briew kiba la ïap, palat 300 ngut kiba la mynsaw bad kumba 50,000 ngut kiba la kynriah shnong haduh mynta.
