Aizawl, Risaw:
Ka seng Zoram People’s Movement (ZPM) ha ka sngi Ba-ar ka la ai ïa ka rai kaba khatduh ha kaba ïadei bad ka jingjied ïa u kyrtong na ka bynta ban pynïakhun na ka Tuichawng konstitwensi ha Mizoram.
Ka seng ka la pynbna ba u Shanti Jiban Chakma un sa long u kyrtong jong ka u ban ïakhun na ka 36-A/C Tuichawng konstitwensi. U Shanti Jiban Chakma, uba dei u khun jong u Ranga Chandra Chakma, u la pyndep ïa ka Higher Secondary jong u ha ka Arts ha Cachar College kaba don ha Silchar, Assam.
Shuh shuh la ïathuh ba u la pyndep ïa ka kyrdan BA ha ka Hindi Praveen na Mizoram Board of Hindi Propagation. U Chakma u la long u President jong ka Branch YCA Gerakuluksora, bad kumjuh kum u President bad u General Secretary jong ki seng kiba kham paw kum ka All Assam Chakma Student Union bad ka Silchar Chakma Student Union.
Na ka jingïaineh jong u ha ka kam, u la long ruh u dkhot jong ka Barak Valley Development Committee bad ka Central Young Chakma Association. Ka jingïaid lynti jong u Shanti Jiban Chakma ha ka kam saiñ pyrthei ka la long kaba sah kynmaw. U la bat ïa ka kam kum u President jong ka seng BJP ha Chakma distrik, u la shahjied ruh kum u Member of District Council (MDC) na Chotapansury konstitwensi.
