Shillong, Risaw 11
U Alison Kharsyntiew un shimti kum u Assistant Coach ka Mohammedan S.C ha ka lympung ïalehkai I-league 2023-24, katba u Andrey Chershynov uba na Russia un shimti kum u head coach ïa kane ka kynhun ïalehkai kaba na West Bengal.
Kane ka khubor ka la paw hadien ba ka Mohammedan ka la buh ïa ki kyrteng ki nongïarap jong kane ka klob hapoh social media ha ka sngi Balang na ka bynta kane aïom.
Ka Mohammedan kan pynkhreh ïa ka jingïakhun ba nyngkong ha la ïing (Kolkata) pyrshah ïa ka Aizawl ha ka 29 tarik mynta u bnai, hashwa ba kan wan sha ka nongbah Shillong ban ïakhun pyrshah ïa ka Shillong Lajong ha ka 3 tarik u Naiwieng.
Kum ban shu pynkynmaw, u Alison u la bat ruh kum u coach ka Shillong Lajong ha ka aïom ïalehkai 2018-19 hashwa ba kan shah pynhiar kyrdan na ka I-League. Kham hadien pat ula shimti kum u Assistant Coach jong ka Northeast United F.C na ka bynta ban long u Khasi uba nyngkong eh ban ïadon bynta ha ka Indian Super League.
