Guwahati, Risaw:
Ki pulit jong ka Tripura ha ka sngi Balang ki la kem ïa arngut ki briew halor ka jingrahbor ïa uwei u nongbylla uba dei u nongshong shnong jong ka Assam.
Kine ki briew kiba la shahkem ki dei kiba la tip kyrteng kum u Mohammad Mainul Islam bad u Zahir Hossain Chowdhury.
U Sub-divisional Police Officer jong ka Amtali, u Asish Dasgupta u la ong ba une u lanot u dei uba la tip kyrteng kum u Jilal Ahmed uba dei na ka thaiñ ba dei peit da ki pulit jong ka Bazarichara ha Assam, une u la shah rahbor ha ka 8 tarik, Risaw na ka thaiñ Badharghat kaba don ha Agartala.
“Hadien ka jingrahbor, kine ki runar ki la ïakren lyngba ka Phone sha ki bahaïing jong u Ahmed, ha kaba ki la dawa pisa na ka bynta ban pyllait ïa u. Ki bahaïing jong u Ahmed ki la leit sha Tripura bad leit sha Boxanagar kaba don ha ka Sonamura Sub-Division jong ka Sepahijala distrik kumba la batai da ki nongrahbor. Ha kane ka jaka, kine ki bahaïing da ka jingjop ki la lah ban bat ïa u Zahir Hossain Chowdhury, ha kaba la aiti ïa u ha kti jong ki pulit ka Kalamchaura kaba don ha Sonamura. Na ka jingbym lap ïa u Ahmed ne na ka jingbym ïoh ban pyllait ïa u na kti jong ki nongrahbor, ka la pynlong ïa ki bahaïing jong u ba kin leit pan jingïarap na ki pulit jong ka Amtali kaba hap hapoh ka thaiñ Badharghat ha kaba u Ahmed u la shah rahbor”, la ong u SDPO.
Hadien ba la ïoh jingtip halor kane ka jingjia, ki pulit jong ka Amtali ki la pynlong ïa ka jingtohkit kaba bniah bad kem sa ïa uwei pat u briew ïa uba la tip kyrteng kum u Mohammad Mainul Islam na AD Nagar kaba don ha ka nongbah Agartala. “Hadien ba la pynlong ïa ka jingtohkit, ngi la lah ban pyllait im ïa u Jilal Ahmed na ka thaiñ Sonamura”, la ong u heh pulit.
U la pyntip shuh shuh da kaba ong ba u runar uba la shahkem hadien u dei uba la tip kyrteng kum u Mainul Islam uba dei u nongshong shnong jong ka Assam bad uba la shong la sah ha ka thaiñ AD Nagar la kham slem, katba u Zahir Hossain Chowdhury u dei u nongshong shnong jong ka thaiñ Sukantanagar jong ka Belonia Sub-Division hapoh ka South distrik jong ka Tripura.
