Shillong, Risaw 12
Ka kynhun ki ‘thei ïalehkai kriket ka Jylla ka la mad biang ïa ka jingshah rem sa ha ka Manipur da 7 wiket ha ka Women’s U-19 One Day Trophy kaba la long ha ka sngi Palei ha Surat, katba ka kynhun ki rangïalehkai U-19 ka Jylla ki la shah rem da 346 run ha ka Bengal ha ka jingïakhun kaba nyngkong jong ka Vinoo Mankad Trophy kaba ha long ha Vijayawada.
Ha kane ka jingïakhun kaba lai, ka kynhun ki ‘thei ïalehkai ka Manipur ka la jop ïa ka kynting pisa ha kaba ka la ailad ïa ka Meghalaya ba kan tied nyngkong. Te kumta ka Meghalaya ka la shah pynkhyllem lut baroh ki nongtied na ka bynta ban kamai tang 97 run ha ki 36.4 over. Ka Janicka R. Marak ka la long tang marwei ban tied haduh 46 run na ki 78 bol, kaba ka Kambesa A. Sangma ka la ïoh 21 run na ki 48 bol.
Kane ka kynhun ka Jylla ka la mad ïa ka jingshah pynkhyllem dangkloi ki nongtied na ki 43/2 sha ki 49/6 hashwa ban kan kynjoh sha ki 97/6. Kane ka la wan lyngba ka jingïatied lang ban kynjoh 48 run hapdeng ka Janicka bad ka Kambesa.
Haba wan shimti ha ka ban tied, ka Meghalaya ka la pyndonkam ïa khyndai ngut ki nongkawang bol, hynrei kim shym la lah ban khanglad ïa ki nongtied ka Manipur kiba la lah ban kynjoh sha ka thong da kaba kamai 98/3 ha ki 27.2 over.
Te kumta ka Meghalaya kan pynkhreh ïa ka jingjop kaba saw pyrshah ïa ka Tamil Nadu ha ka sngi Saitjaiñ.
Ha kawei pat ka jingïakhun jong ki shynrang ha ka lympung ïalehkai Vinoo Mankad Trophy kaba la long ha Vijayawada, ka Meghalaya ka la shaïong hadien ba ka Bengal ka la lah ban kamai haduh 402/3 ha ki 50 over. Hynrei haba wan beh ïa ka thong, ka Meghalaya ka la lah ban kamai tang 56 run hadien ba ka la shah pynkhyllem baroh ki nongtied ha ki 35.2 over.
Ka long ka sngi kaba jwat bha ïa ka kynhun ïalehkai ka Jylla ha kaba ka la lah ban pynhap tang lai wiket ïa ka liang pyrshah. Kine ki kynthup ïa u Kshtij Singhania (1/36), Angkit Tamang (1/52) bad u Da-u-la-biang Shangpliang (1/59), katba u Shubham Rasaily uba la lah ban tied 19 run
Te kumta ka Meghalaya ka la khmih lynti ban wanphai da ka jingkhlaiñ bor ha ka jingïakhun kaba ar pyrshah ïa ka Uttarakhand ka ban long ha ka sngi Saitjaiñ.
