Shillong, Risaw 12
Ka Football Association of Malaysia (FAM) ha ka sngi Ba-ar ka la pynbna ba ka la pynkylla ïa ka prokram ïalehkai na ka bynta ka Merdeka Cup 2023 ha ka khyllipmat kaba khatduh hadien ba ka Palestine ka la weng noh ïa ka jingïashim bynta ha kane ka lympung.
Ha kane ka lympung yn don noh sa tang lai tylli ki kynhun kata ka India, Tajikistan bad ka Malaysia ki ban ïakhun ha ka dur jong ka ‘knock-out format’.
Kat kum ka prokram kaba nyngkong, ka India kan ïakynduh pyrshah ïa ka Malaysia ha Bukit Jalil Stadium kaba lah ban ngiam haduh 90,000 ki jaka shong, ha ka 13 tarik mynta u bnai ha Kuala Lumpur. Ka kynhun ka ban khur ïa ka jingjop kan ïakhun pyrshah ïa ka Tajikistan ha ka final ka ban long ha ka 17 tarik mynta u bnai.
“La hap ban pynkylla ïa ka prokram ïalehkai hadien ka jingïalang kaba kyrpang hapdeng ka FAM kum ka nongpynïaid jong ka Independence Cup (Merdeka) 2023 ryngkat ki bor ba dei khmih jong ka kynhun ïalehkai ka India bad ka Tajikistan hynne ka step hadien ka jingweng ka kynhun ïalehkai jong ka Palestine,” la ong ka Football Association of Malaysia ha ka kyrwoh ba la pyllait ha ka sngi Ba-ar.
Kumba ka paw ka kynhun ïalehkai ka ri India ka la poi ha Kuala Lumpur ha ka lah sngi U Blei na ka bynta ban pynkhreh ïa kane ka lympung bad u Sunil Chhetri un shimti kum u kapten.
Kane ka lympung ïalehkai ka long ruh shi bynta ban pynkhreh ïa ka Asian Cup bad ruh ki jingïalehkai jong ka lympung ïaknieh jong ka World Cup Qualifiers.
