Aizawl, Risaw:
Ym slem hadien ka jingshah kyntait bad ka jingbym ai ïa ka tiket da ka seng Mizo National Front (MNF), u Lamphang jong ka Ïingdorbar u Lalrinliana Sailo u la thmu ban leit pynïasoh noh bad ka seng BJP, la ong u nong-ai-ktien jong ka seng BJP ha ka jingïakren bad ki nongthoh khubor ha ka sngi Balang, ha kaba u la bynrap shuh shuh da kaba ong ba kane ka la long sa kawei pat ka daw ka ban ktah jur ïa ka seng kaba bat ïa ka jingsynshar hashwa ban pynlong ïa ka ilekshon Assembly ha Mizoram ha ka 7 tarik, Naiwieng.
U Sailo kumba la pynbeit ha ka sngi kaba bud u la pynrung kyrteng hapoh ka seng.
U nongai-ktien jong ka seng BJP u la ong ba u Sailo un sa pynïaid ïa ka seng BJP ha ka ilekshon ka ban sa wan jong ka ilekshon Assembly, ha kaba ïadei bad kane, ki heh nongïalam jong ka seng haduh ba la thoh ïa ka khubor kim pat lah ban ai ïa ka rai na kano ka konstitwensi ba un mihkhmat ne ba un long u nongïakhun.
Kumba la ïathuh ka tyllong khubor, la ong ba u Sailo u la long u MP uba phra jong ka Mizoram uba la mih na ka seng MNF hashwa ban pynlong ïa ka ilekshon Assembly ha ka jylla.
U Sailo u la shajied na Chalfilh Assembly konstitwensi ha ka jingïakhun na ka tiket jong ka seng MNF ha u snem 2018. Ka tyllong khubor ka la ïathuh shuh shuh ba ka jingbym ïoh tiket jong u na ka seng ka la long namar ki jingkynthoh ba u la kren halor ka jingïatreilang hapdeng ka seng MNF bad ka NDA.
