Shillong, Risaw 12
U Kapten ka Belgium u Romelu Lukaku u la ong ba un pdiang sngewbha ïa u Thibaut Courtois sha ka kynhun ïalehkai ka ri hadien ba une u rangapkol um shym la ïadon lang bad ka kynhun ha u Jylliew mynta u snem.
U Courtois u la kyntait ban ïalehkai ha u Jylliew na ka bynta ka European Championship (qualifier) pyrshah ïa ka Estonia bad kat kum ka jingïathuh da u coach u Domenico Tedesco ha kane ka taïew u la ong ba um shym la ïoh shuh ban ïakren bad utei u rangapkol ka Real Madrid.
U Courtois u la mynsaw ka khohsiew bad u la shah sumar ha u Nailar bad kane ka la pynslem ïa u ba un wanphai biang sha ki jingïalehkai, hynrei dangshen mynta ka taiew u rangïalehkai ‘dien ka Belgium u Timothy Castagne u la pynpaw ba um thikna ba u Courtois un wanphai sha ka kynhun khlem da lah ban ai jingpynshai kaba biang.
Hynrei ha ka sngi Balang u Lukaku u la pynpaw la ka jong ka jingsngew da kaba ong, “Naduh ka mynsien ngi dei ban buh shadien ïa kiei kiei kiba jia ha ngi.”
Kane ka jingpynpaw ka jong u long hashwa ba ka Belgium kan pynkhreh ïa ka lympung ïaknieh pyrshah ïa ka Austria ha ka step jong ka sngi Saitjaiñ ha Vienna.
“Kan dei ka sngi ba u Thibaut un shim ïa ka rai na ka bynta ban wanphai biang sha ka kynhun. Lada u lah ban wanphai, kan long kaba kongsan eh ïa ka kynhun.”
“Nga ngeit skhem ba u Thibaut un ïoh ka jingkoit kaba pura bad lada u lah ban wanphai sha ka kynhun, ngan long uba nyngkong eh ban pdiang sngewbha ïa u.”
Kum ban shu pynkynmaw, u Lukaku u la shah jied ha ka por ba u Courtois u la shah jied kum u kapten ha u Jylliew, bad u Kevin De Bruyne u la ngat ha ka jingmynsaw.
