Guwahati, Risaw:
U Myntri Rangbah jong ka Assam u Himanta Biswa Sarma ha ka por ba u la don bynta ha ka ban pyntreikam ïa ka skhim Orunodoi Scheme ha BTR kaba don ha Kokrajhar ha ka 11 tarik, Risaw u la ong ba ka sorkar ka la don jingthmu ban pynrung kyrteng shuh sa ïa ki 5 lak ngut ki nongïoh myntoi hapoh ka katei ka skhim ha kine ki sngi ban sa wan.
Ha ka jingïakren bad ki nongthoh khubor hadien kane ka prokram, u Sarma u la ong,”Hapoh ki ar sngi, yn sa pynrung kyrteng shuh shuh sa ïa kumba 7 lak ngut ki nongïoh myntoi ki ban shah kynthup hapoh ka Orunodoi Scheme. Da kane, ka jingdon jong baroh ki nongïoh myntoi na ka Orunodoi kan sa kiew sha ki 27 lak ngut. Ha kine ki khyndiat sngi ban sa wan, ngin sa pynrung kyrteng shuh sa ïa kumba 5 lak ngut ki nongïoh myntoi hapoh ka Orunodoi. Ka thong jong ngi ka long ban pynbiang da kumba 50 percent na ka jingdon jong ki nongshong shnong kiba don ïa ki Card Ration ba kin ïoh jingmyntoi na kane ka Orunodoi Scheme. Hapoh ka jingtreikam jong kane ka Orunodoi Scheme, ki nongïoh myntoi kin sa ïoh ka jingïarap kaba T. 1200 man u bnai ha kaba T. 250 yn sa lah ban pyndonkam na ka bynta ban siew ïa ka bai bording, na kane kin sa ïoh ruh ban thied 2 kilo ki jingbam shyieng bad symbai, 2 kilo u khaw, T. 400 tyngka kan leit sha ka jingpynlut jong ki na ka bynta ki dawai-dashin bad T. 170 kan leit sha ka jingsiew jong ki ïa ka ram kaba ki shim. Ngi la dep ban shon ruh ïa ki kot lyngkniap ki ban batai shai shaphang ka rukom kynshew bad ka jingpynïaid ïa ka pisa”.
U Myntri Rangbah u la ong shuh shuh ba ka sorkar kan sa sam ïa ki kot lyngkniap sha ki paidbah ba kin lah ban pule ha kaba kin sngewthuh shai shaphang ki kyndon ba kumno yn pyndonkam ne ban pynleit ïa ka pisa kaba wan na ka Orunodoi Scheme ha ka rukom kaba dei na ka bynta kine ki nongïoh myntoi.
