Shillong, Risaw 13
Ka kynhun ïalehkai phutbol ka ri ka la mad noh ïa ka jingshah rem ha ka Malaysia da 2-4 kol bad kane ka la long ka jingkut ka jingïaid lynti ha ka Merdeka Cup ha ka sngi Thohdieng.
Ha kane ka jingïakhun, ka Malaysia ka la pynkhih jar nyngkong eh ha ka minit kaba 7 lyngba u Dion Cools hashwa ba u Naorem Mahesh Singh un lah ban pynïakhaid kylla ha ka minit kaba 13. Ka Malaysia ka la pynbud biang ïa ka kol kaba ar lyngba ka penalty ba la shut da u Arif Amin (20). Hashwa ban kut ka jingïalehkai jong ka kylla step ka India ka la shah thep biang sa shi kol lyngba u Faisal Halim na ka bynta ban tam da 3-1 kol.
Hadien katto katne por ba la bteng ïa ka jingïakhun jong ka kylla miet ba u kapten ka India u Sunil Chhetri (52) u la lah ban pynphai kylla shi kol. Hadien san minit u Lallianzuala Chhangte u la pynlehnohei ïa kabu ksiar kaba u la ïoh. Ha kane ka jingïakhun u Chhangte u la ïoh ïa ka bol hapoh ‘box’ bad u la ïoh ban shut, hynrei ka la leit dei pynban na ka met jong na u Ahmad.
Kane ka kynhun jong u Igor Stimac ka la khmih lynti ban ïai bteng ha ka ban ïakhun tyngeh shuh shuh, hynrei kam shym la lah ban pynurlong. Ka Malaysia ka la thep biang ïa ka kol kaba saw lyngba u Corbin Ong ha ka minit kaba 61.
Te kumta ka Malaysia kan ïakhun pyrshah ïa ka Tajikistan ha ka final ka ban long ha ka 17 tarik mynta u bnai.
