Shillong, Risaw 13
Ka hat-trick ba la ïoh da u Eliastar Nongsiej ka la biang pura ïa ka Mylliem Lum SC ban khur ïa ka jingjop ha ka SSA SRGT 3rd Division Football League 2023, hadien ba pynliem noh ïa ka Umpling SC da 3-0 kol ha ka sngi Thohdieng ha madan MFA, Polo.
Ha kane ka jingïakhun u Eliastar Nongsiej u la ïoh ban thep ha ka minit kaba 38, 69 & 80 na ka bynta ban pynlong ïa ka Mylliem Lum ban bat ïa ka kyrdan ba hakhlieh jong ka Group-C da kamai 6 point na ki ar sien ïakhun.
Ha ka jingïakhun jong ka Group-A kaba la long ha SSA Stadium, ka Meghalaya Police F.T ka la bteng ban ïakhun ia ka jingjop kaba ar hadien ba lah pynliem noh ïa ka Nongmensong SC da 2-1 kol.
Ha kane ka jingïakhun, ka MLP ka la ioh ban pynkhih jar nyngkong eh lynba u Alfostar Sunn ha ka minit kaba 17. Hynrei ka Nongmensong ka la lah ban pynïakhaid kylla lyngba ka kol ba la thep da u Shemphang Myrthong (45). Hadien katto katne por ka MLP ka la pynbud ïa ka kol kaba ar lyngba u Ramos Ingti (75) na ka bynta ban khur syndon ïa ka jingjop.
Ha ka jingïakhun jong ka Group-B kaba la long ha SSA Stadium, ka Pomlakrai SC la wanphai da ka jingjop hadien ba ka la lah ban pynliem noh ïa ka Mawryngkneng SC da 2-1 kol.
Watla ka la shah rem ha ka jingïakhun kaba nyngkong ha ka PFR da 4-0 kol, hynrei ha kane ka jingïakhun kaba ar ka Pomlakrai ka la ïakhun tyngeh ha kaba ka la ïoh ban pynkhih jar nyngkong eh lyngba u Phyrnaiborlang Sohtun ha ka mint kaba 50.
Hadien lai minit ka Mawryngkneng ka la lah ban pynphai kylla lyngba u Brokenstar Warmalai (53). Ka Pomlakrai ka la thep biang ïa ka kol kaba ar lyngba u Sparlington Thongni (59) na ka bynta ban khur syndon ïa ka jingjop.
Ha kawei pat ka jingïakhun na kane ka group hapdeng ka PFR Football Academy ka la ïasam mar shi point bad ka Nongkseh SC hadien ba ki la ïakhaid mar 1-1 kol.
Watla kine ki kynhun kim shym la lah ban pynkhih jar ha ka kylla step, hynrei dei ha ka kylla miet ba ka PFR ka la ioh ban thep kol nyngkong lyngba u Elaan Rynjah ha ka minit kaba 55. Hynrei shwa ban wai ka Nongkseh ka la lah ban pynphai kylla lyngba u Tony Syngkli ha ka minit kaba 80 na ka bynta ban ïakhaid mar shi kol.
Kane ka lympung kan bteng biang ha ka sngi Saitjaiñ ha kaba ka Krang SC kan iakhun pyrshah ïa ka Umlyngka SC ha ka por 11 baje mynstep ha SSA Stadium, kumjuh ka Lawmali Pyllun SC ïa ka Tynring SC ha ka por 1 baje mynsngi ha 3rd Ground, ka Lumparing SC ïa ka Mawpat SC ha ka por 1 baje ha SSA Stadium bad ka Rynjah SC ïa ka Lumdiengjri SC ha ka por 3 baje janmiet ha SSA Stadium.
