Shillong, Risaw 13
Ka Assam Rifle Public School (ARPS) ka long ba la pynkhreh ïa ka jingïakhun kaba nyngkong ha ka 62nd Subroto Cup Football Tournament 2023 pyrshah ïa ka St. Francis Xavier High School (DD & DNH) ha ka sngi Saitjaiñ ha nongbah Delhi.
Kane ka kynhun kaba na East Khasi Hills District ka la long sa tang kawei ka ban mihkhmat ïa ka Jylla ha ka Subroto Cup mynta u snem hadien ba ka Saiden Secondary School (U-17 girls) lem bad ka H.K. Sing SS (U-14) ki la shah rem noh ha ka quarter final.
Kane ka kynhun ïalehkai hapoh ka jingïalam u Badamut Riahtam (coach) ka la don ha ka Pool-D kaba kynthup lang ruh ïa ka Khajaman H.S.S, Trichy (Tamil Nadu), San-jeevan Vidhyaniketan & Chhatra-pati Shivaji Kanishta Mahavidya-laya (Maharashtra) bad ka Navy Children School, Mumbai.
Dangshen utei u coach uba la pynpaw ba kane ka kynhun ka la long ba la pynkhreh bha na ka bynta kane ka lympung namar kan dei ka sien kaba nyngkong eh ban ïoh mihkhmat ïa kane ka Jylla.
“Kumba phi ïa tip ba kane ka kynhun ka dei kaba la ïateh lok bad ka shlem treikam jong ka Bhaichung Bhutia Academy. Te kumta kine ki khynnah ki dei kiba la shah hikai hapoh kane ka shlem ai jinghikai,” la ong u Bah Badamut.
“Te kumta kum ka kynhun ngi khmih lynti ba kine ki khynnah kin pyni ïa ki sap ïalehkai ba kyrpang bad ban ym ailad ïa ki kynhun kiba don lang ha kane ka pool khnang ba ngin lah ban kynjoh sha ka thong.”
