Shillong, Risaw 13
Hadien ar snem bym lah ban pynlong ïa ka ilekshon jied nongkitkam, ka Meghalaya Football Asso-ciation (MFA) ka la ïaid shakhmat ban pynlong ïa ka ilekshon jied ïa ki nongkitkam kiba thymmai na ka bynta ka samoi treikam kaba saw snem.
Ïa kane ka ilekshon yn pynlong mynta ka sngi Saitjaiñ bad kat kum ki khubor la ong ba kin don tang mar ar ngut ki ban ïakhun ïa ka kam President bad General Secretary bad kane ka mut ba kin hap ban ïakhun para marwei hapdeng jong ki.
Ki ar ngut ki ban ïakhun ïa ka kam Presi-dent ki long u Bah Ham-letson Dohling (MLA barim ka Mylliem Consti-tuency) u ban mihkhmat na ka Khadsawphra Sports Association lem bad u Bah EMH Passah, Wor-king President ka West Jaiñtia District Sports Association (WJDSA) bad uba dang bat ruh haduh mynta kum u Vice-President ka MFA.
Katba ïa ka kam General Secretary kin don ar ngut ki ban ïakhun ha kane ka ilekshon kata u Convener ka Youth Development Cell jong ka MFA u Bah Sunesh Syiem (Sohra Sports Association) lem bad u Bah Dipshon Ryntathiang (Ri Bhoi District Sports Association) uba bat ia ka kam kum u Joint Secre-tary ka MFA.
Ki khubor ki ïathuh ba ha kane ka kynti kaba mynta ki lah ban wan mih da kiba thymmai ki ban kit ïa ka lyngkor jong ka MFA na ka bynta ka samoi treikam kaba saw snem kynthih. Kane ka long namar kiba bun hi kim lah shuh ban kit ïa ka kam kaba khia jong kane ka synjuk ïalehkai phutbol. La ïathuh ruh ba u President ba mynta u Bah Larsing Ming Sawyan (uba la bat la ar sien kynthih), kumjuh u General Secre-tary u Bah S.S Rapthap lem bad u Vice-President u Bah Diverland Lyngdoh bad B. Diengdoh ki la rai ban ym ïakhun shuh ha kane ka kynti kaba mynta.
Lah ban pynkynmaw ïa kane ka ilekshon ban jied ïa ki nongkitkam kiba thymmai la pynlong khatduh eh ha u snem 2017 bad kane ka samoi treikam ka la dei ban kut noh ha u snem 2021, hynrei na ka daw ka jingwan lynshop ka khlam Covid-19 ym shym la lah ban pynlong ïa ka.
Hadien ba la kut katei ka khlam la sdang ban mih ki kynrum kynram hapoh katei ka synjuk ha kaba la kynnoh ba la shu pynïaid ïa ka tang da ar ngut ki dkhot, katba kiwei ki dkhot kim don jingtip eiei.
La ong ba ka jingpynïaid jong ki ar ngut ka la mih ka jingbym ïasngewthuh jingmut hapdeng ki para dkhot ha kaba wat ïa ka Youth League kaba dei ka lympung jong ki khynnah ïa kaba la dep ban pynbna paidbah ban pynlong, hynrei la hap ban pynsangeh noh na ka daw ka jingpynlong ïa ka Amateur League (kaba dei ka lympung ka bym don jingmyntoi eiei).
Kaba sngewphylla ka long ba ïa katei ruh ka Amateur League ym shym la lah ban pynkut bad dangshen ki kynhun kiba ïashim bynta ki la dawa ban pynphai noh ïa ka pisa kaba ki la dep siew sha ka MFA.
