Jowai, Risaw 13
Ka Mukhla FC ka la long ka lahduh kaba nyngkong jong ka lympung ïalehkai (L) Kesilroy Pala Invitation Football Tournament 2023 ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka lah ban pynliem noh ïa ka Salaroh FC da 2-0 kol ha ka jingïakhun final kaba la long ha Kiang Nangbah Stadium kaba ha Ladthadlaboh Jowai ha ka sngi Thohdieng.
Ïa kane ka lympung ïalehkai la wan ban pynhap pyrda da u khun jong u (L) Kesilroy Pala, u Bah Sniawbhalang Dhar uba dei u Symbud Myntri Rangbah ka Sorkar Jylla ha ka jingdonlang ki ba haïing hasem nalor u MLA ka Jowai u Bah Wailadmiki Shylla, u Doloi ka Elaka Jowai u Bah Puramon Kynjin, ki dkhot nongkitkam bad nongïalam ka WJDSA kiba kynthup ïa u Bah EMH. Passah, u General Secretary u Bah Lammat O. Laloo ha ka jingïalang kaba la pynïaid da u Vice President WJDSA u Bah Patrick Lamare.
Haba phai sha ka jingïakhun kaba la wan sakhi lang da u paidbah ba bun, ka jingïakhun naduh ba sdang haduh ban da kut ka por ba la buh ka la long kaba shongshit bha ha kaba baroh ar tylli ki kynhun ki la ïaleh shitom ban ïoh pynkhih jar bad shwa ban kut baroh ar ki kylla ka Mukhla FC ka la ïoh ban pynkhih jar ha ka minit kaba 45+2 bad kawei pat ha ka minit kaba 90+5 ba la thep da u Primrose Lamat.
Hadien ka jingïakhun la sam khusnam sha baroh ar ki kynhun ha kaba ka lahduh jong kane ka lympung ka la ïoh ban khur ïa ka song pisa ba T. 5 lak ryngkat ka trophy, katba kynhun kaba wan ba-ar ka la ïohpdiang ïa ka khusnam pisa ba T.2 lak lem ka trophy.
Ha kane ka sngi la sam ruh ïa ki khusnam sha ki nongïalehkai kiba la ïalehkai bha ha kane ka lympung kum ka khusnam Man Of the Match ba la ïoh rah da u Primrose Lamat bad ka nam Best Goalkeeper kaba la leit sha u Aibormiki Suchiang baroh ar ngut ki dei na ka Mukhla FC.
