Imphal, Risaw:
Naba ka Manipur ka la ïakhun halor ka jingktah jur na ka jingjynrat bad ka jingpynduh pyndam ïa ki syntiew Poppy ba la thung ha ka jylla, kawei ka kompeni slasha jong ki riewshimet ka la ai jingmut ba ha kaba ïadei bad ka jingpyntreikam ba la pynduh ïa ki jingdih pynbuaid la dei ban pynbun noh da ki kper slasha.
Ka Meckley Tea India Company, kaba don ha Manipur dang shen ka la buh jingtyrwa na ka bynta ban buh da ka karkhana tylliat slasha, kane ka la bei tyngka na ka bynta ban rep bad ban pynmih slasha ha Manipur bad na kane ka jingthmu ki nongpynïaid jong ka kompeni ki la leit jurip bniah ïa kiba bun ki jaka na ka bynta kane ka jingthmu pyntreikam ha ka jylla, ba kan dap da ki kper slasha kiba jyrngam, khnang ban khring ïa ki nongjngohkai pyrthei na ka por sha ka por lyngba kine ki kper slasha.
U stad wad bniah ne u stad saïan halor u slasha u P. Bordoloi, uba long u nongai jingmut barim jong ka Toklai Tea Research Association, kaba long ka jaka pule bad wad bniah halor u slasha ha ka ri, u la batai shai halor ka jinglong jong ka suiñbneng, ka jingshit jingkhriat, ka jinghap slap bad ka jinglong ka khyndew ha kine ki thaiñ ha kaba la ong ba ki la long ki jaka kiba biang eh na ka bynta ban rep slasha khnang ba kan long ka jylla kaba hakhmat eh ka ban lah ban pynmih ïa u slasha uba bha tam ha ka pyrthei.
Kumba la ïohi jngai, la ong ba kane ka jingbuh ïa ki kper slasha, nalor ka karkhana kan sa wanrah ïa ki lad ïohkam ïohjam na ka bynta ki nongshong shnong jong ka jylla.
