Imphal, Risaw:
Naba sheptieng ïoh don u khñiang jingpang ubym lah ban tip ne ithuh hadien ka jingïap jong kiba bun ki sniang ha ki katto katne tylli ki distrik, ka jingbam dohsniang jong ki briew ka la kham duna, ha kaba ïa ka dor jong ka la hap ban pynhiar noh na ka dor ba ju die, kane ka la ktah jur ïa ka ïew die dohsniang ha Manipur, khamtam ha ka nongbah Imphal.
Ki heh jong ka Manipur Veterinary and Animal Husbandry Department ki la ong ba la shim ïa ki nongmuna na ki sniang kiba la ïap ha Kakching bad Imphal East distrik na ka bynta ban khmih bniah ïohba don shisha ki khñiang jingpang kiba ktah ïa ki sniang ha ka jylla.
Ïa ki nongmuna ba la shim na ki sniang la phah sha Guwahati, bad lada lap ba don u khñiang jingpang, ka tnat ka la hap ban shim ïa ki sienjam na ka bynta ban tehlakam ïa ka jingpang, la ïathuh u heh ba dei khmih.
Ha u snem ba la lah, kumba la sakhi, la ong ba ka la don ka jingpang ba la ktah ïa ki sniang ba la tip kum ka African Swine Fever (ASF) kaba la jia ha ki lai tylli ki distrik jong ka Manipur kaba kynthup ha Kakching, Bishnupur, bad Noney, ha kaba kane ka jingïap jong ki sniang ka la pynlong ïa ka sorkar ba kan shim ïa ki sienjam na ka bynta ban lah ban ïakhun halor kane ka jingpang.
