Aizawl, Risaw:
Ka seng kaba bat ïa ka jingsynshar ka Ruling Mizo National Front (MNF) bad ka Hmar People’s Convention (Reformation), ka kynhun seng jong ka seng HPC, ha ka sngi Saitjaiñ ki la thaw ïa ka kynhun synrop na ka bynta ban ïatreilang ha ka ilekshon Assembly ka ban sa long ha ka 7 tarik, Naiwieng, ha ka jylla. Ïa kane ka jingïamynjurlang la ïasoi ha ka shlem treikam jong ka MNF da u General Secretary jong ka MNF u Lalmuanthanga Fanai ha ka kyrteng jong u General Secretary jong ka seng bad jong ka HPC (R) u HT Vunga.
Katkum ka jingïasoi soskular jong ki, ka seng MNF bad ka HPC (R) kin sa ïatreilang ha ka ilekshon Assembly ka ban sa long bad ka seng HPC(R) kan sa ai ka jingkyrshan kaba pura bad trei shitom ban ai jingkyrshan ïa ki kyrtong jong ka seng MNF ha ki lai tylli ki konstitwensi ba shong shnong da ki Hmar kiba hap hapoh ka thaiñ Sinlung Hills Council, kata hapoh ka Tuivawl, Chalfilh bad Serlui kumba la jied. Ka seng MNF, lada ka wan ha ka bor synshar kan sa pyntreikam bad shim ïa ki sienjam ban pyntreikam ïa ka Memorandum of Settlement (MoS) hapdeng ka sorkar Mizoram bad ka seng barim jong ka Hmar People’s Convention (Democratic) ne HPC (D) kumba la ïasoi ha u snem 2018. Kane ka seng kan sa pynbiang ki jngai jingïarap bad ki jingmyntoi kiba bun kiba kynthup kum ha ka ban aikam-aijam sha ki longïing jong kito ki Hmar kiba la shah pynïap martir, bad kiba la duh ïa ka jingim na ka jingshah hiar thma ha ki dkhot jong ka HPC (D), la ong ka jingïateh soskular.
